පිටියේදී ඇති කරගත් ගැටුම නිසා වෛභව් සූර්යවංශිට දැඩි විනය පියවර? අවසන් තීරණය BCCI අතේ

ශ්‍රී ලංකා ‘ඒ’ කණ්ඩායම සමඟ පැවැති එක්දින තුන්කොන් තරඟයක් අතරතුර පිටියේදී ඇති වූ දරුණු බහින්බස්වීමක් සහ ගැටුමක් හේතුවෙන්, ඉන්දීය යොවුන් සුපිරි පිතිකරු වෛභව් සූර්යවංශිට (Vaibhav Sooryavanshi) දැඩි විනය පියවරයන්ට මුහුණ දීමට සිදුවනු ඇතැයි තොරතුරු වාර්තා වෙනවා.

පසුගිය සඳුදා (ජූනි 15) දඹුල්ලේදී පැවැති මෙම තරඟයේදී, සුපිරි පන්දුවාරයේ තියුණු ජයග්‍රහණයක් වාර්තා කිරීමට ශ්‍රී ලංකා ‘ඒ’ කණ්ඩායම සමත් වුණා.

තරගයෙන් අනතුරුව වෛභව් සූර්යවංශි සහ සූර්යන්ෂ් ෂෙඩ්ජේ නැවත ක්‍රීඩාගාරය වෙත යමින් සිටියදී මෙම නොසන්සුන්කාරී තත්ත්වය හටගෙන ඇති බවයි වාර්තා වෙන්නේ.

එහිදී උරණ වූ ඉන්දීය පිතිකරුවන් ශ්‍රී ලංකා ක්‍රීඩකයින් සමඟ මුහුණට මුහුණ ලා දැඩි බහින්බස්වීමක නිරත වී ඇති අතර, එය එකිනෙකා තල්ලු කරගන්නා මට්ටම දක්වා දුරදිග ගියා.

වාර්තා වන අන්දමට, මෙම සිදුවීමට අදාළ තරග තීරකවරයා විසින් ක්‍රීඩකයින්ට දඩ පැනවීමට නිර්දේශ කර තිබෙනවා.

කෙසේ වෙතත්, වෛභව් සූර්යවංශිට එරෙහිව ගන්නා අවසන් විනය පියවර සම්බන්ධයෙන් ඉන්දීය ක්‍රිකට් පාලක මණ්ඩලය (BCCI) මෙතෙක් ස්ථිර තීරණයක් ගෙන නොමැති අතර, ඔවුන් ඉදිරියේදී මේ පිළිබඳව අවසන් තීරණය ගැනීමට නියමිත බවයි වාර්තා වෙන්නේ.

'Sportstar' වෙබ් අඩවියට අනුව, තරග තීරක ප්‍රදීප් ජයප්‍රකාශ විසින් වෛභව් සූර්යවංශි සහ ශ්‍රී ලංකා කණ්ඩායමේ විෂේන් හැලඹගේ යන ක්‍රීඩකයින්ට "ඔවුන්ගේ තරඟ ගාස්තුවෙන් සියයට 50ක දඩයක්" නිර්දේශ කර තිබෙනවා.

මීට අමතරව, මෙම සිදුවීම සම්බන්ධයෙන් ඉන්දියා ‘ඒ’ කණ්ඩායමේ නායක තිලක් වර්මාට "සියයට 30ක දඩයක්" පැනවීමට ද යෝජනා කර ඇති බවයි වාර්තා වෙන්නේ.

එසේම, ශ්‍රී ලංකා ‘ඒ’ කණ්ඩායමේ කඩුලු රකින ක්‍රීඩක නිරෝෂන් දික්වැල්ලට ද සියයට 20ක දඩයක් පැනවීමට නිර්දේශ කර තිබෙනවා. .

ජාත්‍යන්තර ක්‍රිකට් පිටියේදී සාමාන්‍යයෙන් විනය පියවර ක්‍රියාත්මක කරනු ලබන්නේ ජාත්‍යන්තර ක්‍රිකට් කවුන්සිලය (ICC) මඟින්.

කෙසේ වෙතත්, ‘ඒ’ කණ්ඩායම් තරග වලදී, තරග තීරකවරයා විසින් තමන් නිර්දේශ කරන දඬුවම් අදාළ ක්‍රිකට් පාලක මණ්ඩල (මෙම අවස්ථාවේදී BCCI සහ ශ්‍රී ලංකා ක්‍රිකට් ආයතනය) වෙත යොමු කරනු ලබනවා.

එම නිර්දේශ ක්‍රියාත්මක කරන්නේ ද නැද්ද යන්න තීරණය කිරීම අදාළ පාලක මණ්ඩල සතුයි.

මූලාශ්‍රය - Firstpost