"අපේ ප්‍රමුඛතාව ජනතාවට උපරිම සහන ලබාදීමයි" - ඉන්ධන මිල අඩු කරමින් පාකිස්ථානු අගමැති කියයි

ලෝක වෙළෙඳපොළේ බොර තෙල් මිල පහත වැටීමේ වාසිය සෘජුවම ජනතාවට ලබා දෙමින්, පෙට්‍රල් සහ ඩීසල් මිල පහත හෙළීමට පාකිස්ථානය පියවර ගෙන ඇති බව එරට මාධ්‍ය වාර්තා පවසනවා.
 
ඒ අනුව, පෙට්‍රල් ලීටරයක මිල පාකිස්ථාන රුපියල් 74කින් සහ අධිවේගී ඩීසල් ලීටරයක මිල රුපියල් 67කින් පහත දමා තිබෙනවා.

රජයේ නිල නිවේදනය නිකුත් කිරීමෙන් පසු නව මිල ගණන් ක්‍රියාත්මකවන අතර, පාකිස්ථානු රුපියල් 373.78කට තිබූ පෙට්‍රල් ලීටරයක නව මිල පාකිස්ථානු රුපියල් 299.78ක්.

එමෙන්ම, පාකිස්ථානු රුපියල් 378.78ක්ව පැවති අධිවේගී ඩීසල් ලීටරයක නව මිල දැක්වෙන්නේ පාකිස්ථානු රුපියල් 311.78ක් ලෙසයි.

ජාතික මණ්ඩලය අමතමින් අග්‍රාමාත්‍ය ෂරීෆ් සඳහන් කර ඇත්තේ, පසුගිය අසීරු අවස්ථාවලදී ජනතාව පෙන්වූ ඉවසීම සහ ඔරොත්තු දීමේ හැකියාව අගය කරන බවයි.

"ගෝලීය උද්ධමනයේ බලපෑමෙන් මහජනතාව ආරක්ෂා කිරීමට රජය ගත හැකි සෑම පියවරක්ම ගත්තා. ජනතාවට උපරිම සහනයක් ලබා දීම අපගේ ප්‍රමුඛතාවයි," යැයි ඔහු වැඩිදුරටත් සඳහන් කර තිබෙනවා.