රුපියල් 1,000ක දුරකථන දීමනාව නිලධාරීන්ගේ වැටුපට එකතු කරනවා - මාලිමා මන්ත්‍රී චන්දන

නිලධාරීන්ගේ රුපියල් 1,000ක දුරකථන දීමනාව වැටුපට එකතු කරන බව ජාතික ජන බලවේගයේ පාර්ලිමේන්තු මන්ත්‍රී චන්දන සූරියආරච්චි පවසනවා.

මන්ත්‍රීවරයාගේ සම්බන්ධීකරණයෙන් පැවති ප්‍රජා සවිබලගැන්වීමේ නිලධාරීන් අතර සාකච්ඡාවෙන් පසු මාධ්‍ය වෙත අදහස් දක්වමින් ඔහු මේ බව සඳහන් කළා.

එහිදී වැඩිදුරටත් අදහස් දැක්වූ මාලිමා මන්ත්‍රීවරයා පවසා සිටියේ දැනට ලබාදෙන රුපියල් 1,000ක දුරකතන දීමනාව වැටුපට එකතු කිරීමේ අනුමැතිය ලැබෙන තෙක් ප්‍රතිපූර්ණ පදනමින් දෙන බවයි.

මීට අමතරව ග්‍රාමීය මට්ටමේදී රු. 2,000 සහ නාගරික මට්ටමේදී රු. 3,000 කාර්යාල දීමනා මෙන්ම ගමන් වියදම් දීමනා ලබාදීමට අදාළ කටයුතු කරමින් සිටින බවත්, නිල මුද්‍රා සකස් කර ගැනීම, ලිපිද්‍රව්‍ය සහ සංවර්ධන සභා කැඳවීම් වෙනුවෙන් රු. 10,000ක මුදලක් ද ප්‍රතිපූර්ණ පදනමින් දැනටමත් ලබා දෙන බවද මන්ත්‍රීවරයා සඳහන් කළා.