විදුලි සැර වැදී තරුණයෙක් ජීවිතක්ෂයට

වාහන සේවා මධ්‍යස්ථානයකදී සිදු වූ විදුලි සැර වැදීමකින් තරුණයෙකු මියගොස් ඇතැයි රුවන්වැල්ල පොලීසිය පවසනවා.

රුවන්වැල්ල, බටුපිටිය ප්‍රදේශයේදී අනතුර සිදුව ඇති බව‍යි වාර්තා වන්නේ.

සිද්ධියෙන් මියගොස් ඇත්තේ එම ස්ථානයේම සේවය කරමින් සිටි 18 හැවිරිදි තරුණයෙක්.

එම තරුණයා ත්‍රිරෝද රථයක් සෝදා පිරිසිදු කරමින් සිටින අතරතුර ජලයට විදුලිය කාන්දුවීමෙන් විදුලි සැර වැදී ඇති බව අනාවරණය වුණා.

අනතුරත් සමග තරුණයා කරවනැල්ල රෝහලට ඇතුළත් කළත් ඒ වන විටත් ඔහු මියගොස් සිටි බවයි වාර්තා වන්නේ.

රුවන්වැල්ල පොලිසිය වැඩිදුර පරීක්ෂණ සිදුකරනවා.