ගොවිතැන මූලික අයිතිවාසිකමක් කිරීමට සූදානම් - සජිත් ප්‍රේමදාස

"ඡන්ද කාලෙට ඇමතිවරු කුඹුරුවලට බැහැලා ගොයම් කකා ස්ථාවර මිලක් දෙනවා කිව්වත් අදටත් එහෙම මිලක් නැහැ. ඡන්දය අවසානයේදී ගොවියා දළ දේශීය නිෂ්පාදනයට ප්‍රමාණවත් දායකත්වයක් නොදෙන 'කසිප්පුකාරයෙක්' බවට පත් කරලා." යැයි විපක්ෂ නායක සජිත් ප්‍රේමදාස පවසනවා.

මානව අයිතියක් ලෙස හැඳින්විය හැකි ගොවිතැන, රටේ ව්‍යවස්ථාව මඟින් ආරක්ෂා කෙරෙන මූලික අයිතිවාසිකමක් බවට පත් කිරීමට සමගි ජන බලවේගය සූදානම් බවද විපක්ෂ නායකවරයා පැවසුවා.

ගොවි ජනතාව මුහුණ දෙන බරපතළ ගැටලු පිළිබඳව සාකච්ඡා කිරීම සඳහා අද (08) පාර්ලිමේන්තුවේ විපක්ෂ නායක කාර්යාලයේ පැවැති විශේෂ හමුවකදී ඔහු මේ බව කියා සිටියා.

මැතිවරණ සමයේදී පමණක් ගොවියා රජ කරවන බව පවසමින් ඡන්දය ලබා ගැනීමට දේශපාලනඥයන් කටයුතු කළත්, මැතිවරණ නොමැති කාලයට ගොවියා සහ ගොවිතැන අසාර්ථක දෙයක් ලෙස සලකා බැහැර කරන බවයි විපක්ෂ නායකවරයා මෙහිදී පෙන්වා දුන්නේ.

මේ අතර වත්මන් ගොවිතැන් ක්ෂේත්‍රයේ නිෂ්පාදන චක්‍රයේ සෑම පුරුකකම බරපතළ අර්බුදයක් නිර්මාණය වී ඇති බවයි විපක්ෂ නායකවරයා සඳහන් කළේ.

බීජ, පොහොර, කෘෂි රසායන, යන්ත්‍ර උපකරණ මිල ඉහළ යාම සහ අලි-මිනිස් ගැටුම වැනි ගැටලු රැසක් මැද ගොවීන් තමන්ගේ කණකර දේපළ පවා උගස් කරමින් වගා කටයුතු සිදු කරන බවද පැවසුවා.

රජයේ මැදිහත්වීම සීමාසහිත වීම හේතුවෙන් ගොවියාට තමන්ගේ වියදමට සරිලන ආදායමක් නොලැබෙන බව පෙන්වා දුන් ඔහු මේ වන විට වී කිලෝවක් නිෂ්පාදනය සඳහා රුපියල් 137ක පිරිවැයක් වැය වුවද, රජයේ ස්ථාවර මිල රුපියල් 120ක් බැවින් ගොවියා සැබවින්ම පාඩු ලබන බවයි සංඛ්‍යා ලේඛන සහිතව පෙන්වා දුන්නේ.