අල්ලස් ගත් ආදායම් පරීක්ෂකවර‍යා ඇතුලු දෙදෙනා යළිත් රිමාන්ඩ්

රුපියල් 5,000ක අල්ලස් මුදලක් ලබාගැනීමේ චෝදනාවට අත්අඩංගුවට ගත් ගාල්ල මහනගර සභාවේ ආදායම් පරීක්ෂකවරයකු සහ වැඩ ක්ෂේත්‍ර කම්කරුවකු ලබන 21 වැනිදා දක්වා යළිත් රක්ෂිත බන්ධනාගාරගත කිරීමට කොළඹ ප්‍රධාන මහේස්ත්‍රාත් අසංග එස්. බෝදරගම අද (14) නියෝග කළා.

සිද්ධියට අදාල නඩුව කැඳවු අවස්ථාවේදි මෙලෙස නියෝග කරනු ලැබුවා.

පුද්ගලික අලෙවි ආයතනයකට අයත් වෙළෙඳ දැන්වීම් පුවරුවක් ප්‍රදර්ශනය කිරීම සඳහා මහනගර සභාවට ගෙවිය යුතු බදු මුදලට අදාල ලේඛන කඩිනමින් ලබාදීමේ පොරොන්දුව මත සැකකරුවන් රුපියල් 5,000ක අල්ලස් මුදල ඉල්ලා ඇති බවයි විමර්ශන නිලධාරීන් අධිකරණයට දන්වා සිටියේ.

සැකකරු ගාල්ල මහේස්ත්‍රාත් අධිකරණයට ඉදිරිපත් කිරීමෙන් අනතුරුව අද දක්වා රක්ෂිත බන්ධනාගාරගත කර තිබුණා.

සිද්ධියට අදාල දෙවන සැකකරු ස්වේච්ඡාවෙන් ප්‍රකාශයක් ලබා දීමට ගාල්ල මහේස්ත්‍රාත්වරයා ඉදිරියේ කැමැත්ත පළ කළ බවද අල්ලස් කොමිසම අධිකරණයට දැනුම් දුන්නා.

සැකකරුවන් වෙනුවෙන් පෙනී සිටි නීතිඥවරුන් ඇප ඉල්ලා සිටියද සුවිශේෂී කරුණු අධිකරණයට ඉදිරිපත් නොවීම නිසා මහේස්ත්‍රාත්වරයා එම ඉල්ලීම ප්‍රතික්ෂේප කළා.