පෝට් සිටියේ චීන ජාතිකයන් අතර ගැටුමක් : එක් අයෙක් පැහැරගෙන ගිහින්

කොළඹ වරාය නගර (Port City) පරිශ්‍රයේදී චීන ජාතිකයන් පිරිසක් අතර ඇති වූ උණුසුම් තත්ත්වයකින් පසුව එක් චීන ජාතිකයෙකු පැහැරගෙන ගොස් ඇති අතර, සිද්ධියට සම්බන්ධ රථයක තිබී ගිනිඅවියක් ද සොයාගෙන ඇති බව අප වාර්තාකරු පවසනවා.

ඊයේ (22) රාත්‍රී 11:00 ට පමණ චීන ජාතිකයන් තිදෙනෙකු නවීන පන්නයේ ජීප් රථයකින් වරාය නගරය වෙත පැමිණ, එහි පිහිටි එල්ලෙන පාලම මත සිට මාළු බාමින් සිට තිබෙනවා.

පසුව අද අලුයම 2:00 ට පමණ KDH වර්ගයේ වෑන් රථයකින් පැමිණි තවත් චීන ජාතිකයන් 15 දෙනෙකුගෙන් පමණ සමන්විත පිරිසක්, වරාය නගරයේ රථගාලේ වාහනය නවත්වා එල්ලෙන පාලම වෙත ගොස් ඇති අතර, එලෙස පැමිණි පිරිස මාළු බාමින් සිටි චීන ජාතිකයන් තිදෙනාට පහර දී, ඒ අතුරින් එක් අයෙකු පැහැරගෙන ගොස් ඇති බවයි වාර්තා වන්නේ.

එමෙන්ම, පැහැර ගැනීමට ලක්වූ පුද්ගලයා පිළිබඳව මේ දක්වා තොරතුරක් අනාවරණය වී නොමැති බවත් අප වාර්තාකරු සඳහන් කළා.

පහරදීමට පැමිණි පිරිස KDH වර්ගයේ වෑන් රථය සිද්ධිය වූ ස්ථානයේ දමා ගොස් ඇති අතර, පොලිසිය විසින් එම රථය පරීක්ෂා කිරීමේදී ඒ තුළ තිබී විදේශයක නිෂ්පාදිත රිවෝල්වරයක් (Revolver) සොයාගෙන තිබෙනවා.

සිද්ධිය සම්බන්ධයෙන් වැඩිදුර පරීක්ෂණ වරාය නගර පොලිසිය විසින් සිදුකරනු ලබයි.