පොලිස් වෙස් ගත් පිරිසක් වැලිපැන්නේ ගමකට පනී - හැටේ සැකකරු ගම්වාසීන් අල්ලා පොලිසිය දෙයි

තමන් පොලිස් නිලධාරීන් බව අඟවා රිටිකැටිය, නව ජනපදයේ නිවෙසකට ඇතුළු වී ඇති පිරිසක් එහි නිවැසියන් බිය ගන්වා රන් මාල 02 ක් හා ජංගම දුරකථනයක් කොල්ල කා පලා ගොස් ඇති අතර ගම්වැසියන් එකතුවී ඉන් එක් අයෙකු අල්ලා වැලිපැන්න පොලිසියට භාරදී තිබෙනවා.

මෙම සිදුවීම සිදුව ඇත්තේ ඉකුත් (31) වැනිදා රාත්‍රී 8.30 ට පමණ බව පොලිසිය පවසනවා.

මෙම සිද්ධිය සම්බන්ධයෙන් රිටිකැටිය, නව ජනපදයේ පදිංචි අදාල නිවෙසේ හිමිකාරිය කරන ලද පැමිණිල්ල අනුව මේ පිළිබඳ පරික්ෂණ ආරම්භ කළ බවයි වැලිපැන්න පොලිසිය සඳහන් කරන්නේ.

පොලිස් නිලධාරීන් බව පවසා සිවිල් ඇඳුමෙන් සැරසුනු සිව් දෙනෙක් නිවස පරික්ෂා කිරීමට අවශ්‍ය බව කියා තම ජංගම දුරකථනය ඔවුන් භාරයට ගත් බවත්‍, ඉන්පසු දියණියත් මවත් ඉදිරි කාමරයේ සිර කර, ස්වාමි පුරුෂයාවත් තමාවත් දෙදෙනෙකු භාරයේ රඳවාගෙන මවගේත් තමාගේත් ගෙල බැඳි රන් මාල ගලවාගෙන මෝටර් රථයෙන් පලා ගිය බවත් පැමිණිලිකාරිය පොලිසියට කර තිබූ පැමිණිල්ලේ සඳහන්.

මේ අවස්ථාවේදී තමා කෑ ගැසූ විට යතුරු පැදියක නැගී පලා යෑමට තැත් කළ සැකකරුවෙකු අසල්වාසීන් විසින් අල්ලා ගත් බවත් ඇය පොලිසියට කර තිබූ ප්‍රකාශයේ වැඩිදුරටත් සඳහන්ව තිබුණා.

මෙසේ පොලිස් භාරයට පත් කර ඇත්තේ මතුගම , පන්නිල , නිල්කෙතවත්ත ප්‍රදේශයේ පදිංචි 60 හැවිරිදි අයෙක්.

මෝටර් රථයෙන් පළා ගිය බව කියන අනුරාධපුරේ පදිංචි "ඩෙලෝ" නැමත්තෙකු ඇතුළු තවත් තිදෙනෙකු පිළිබඳව තොරතුරු අණාවරනයවී ඇති අතර ඔවුන් අත් අඩංගුවට ගැනීම සඳහා පොලිසිය පරික්ෂණ පවත්වනවා.

මෙහිදී සැකකරුවන් දමා ගිය මන්නා පිහි 02 ක්, යකඩ අඬුවක්, මුහුණු ආවරණ , ගම් ටේප්, භූමිතෙල් සහිත බෝතල් 02 ක් , ව්‍යාජ වාහන අංක සහිත කොළයක් , යතුරු පැදියක් හා බෑගයක්ද පොලිස් භාරයට ගෙන තිබෙනවා.

වැලිපැන්න පොලිසිය මේ පිළිබඳව වැඩිදුර පරික්ෂණ පවත්වනවා.