මහර බන්ධනාගාර අර්බුදයේ වගකීම භාරගෙන අධිකරණ අමාත්‍යවරයා වහා ඉල්ලා අස්විය යුතුයි! - ෆ්‍රී ලෝයර්ස්

මහර බන්ධනාගාරයේ නොසන්සුන්කාරී තත්ත්වය පාලනය කිරීමට සහ එය වළක්වා ගැනීමට අපොහොසත් වීම සම්බන්ධයෙන් අධිකරණ අමාත්‍ය හර්ෂණ නානායක්කාර සහ අධිකරණ අමාත්‍යාංශයේ ලේකම් අයේෂා ජිනසේන දැඩි ලෙස හෙළා දකිමින් Free Lawyers සංවිධානය විසින් විශේෂ මාධ්‍ය නිවේදනයක් නිකුත් කර තිබෙනවා.

බන්ධනාගාරගත වූවන්ගේ අයිතිවාසිකම් සුරැකීමේ කමිටුව (CPRP) විසින් නිකුත් කරන ලද තොරතුරු උපුටා දක්වමින් අදාළ නිවේදනයේ සඳහන් වන්නේ, මහර බන්ධනාගාරය තුළ මරණයක් සිදුව ඇති බවත්, තුවාල ලැබූ රැඳවියන්ට උපකාර කිරීමට උත්සාහ කළ පිරිස් වෙත බන්ධනාගාර නිලධාරීන් විසින් වෙඩි තබා ඇති බවට වාර්තා වන බවත්ය.

මීට පෙර පුද්ගලයින් 30 දෙනකුට ආසන්න පිරිසකට මරු කැඳවූ මීගමුව බන්ධනාගාර ගැටුම සිදුවී මාසයක් ගතවීමටත් පෙර නැවතත් මෙවැනිම මාරාන්තික තත්ත්වයක් ඇතිවීම බන්ධනාගාර පද්ධතියේ පවතින පාලනමය කඩාවැටීම ප්‍රදර්ශනය කරන බව පවසන එම සංවිධානය, අධිකරණ අමාත්‍යවරයාට එරෙහිව පාර්ලිමේන්තුවට ඉදිරිපත් වූ විශ්වාසභංග යෝජනාව ආණ්ඩුවේ බහුතරයෙන් පරාජය කරමින් වගවීම පැහැර හැරි බවට ද චෝදනා කර තිබෙනවා.

එමෙන්ම, බන්ධනාගාර තුළ මෙවැනි පුපුරන සුළු තත්ත්වයක් පවතිද්දී, ශ්‍රී ලංකා නීතිඥ සංගමය (BASL) හෝ අධිකරණ සේවා සංගමයේ (JSA) පූර්ව උපදේශනයකින් තොරව ජ්‍යෙෂ්ඨ විනිසුරුවරුන්ගේ විශ්‍රාම යෑමේ වයස ඉහළ නැංවීමේ ආණ්ඩුක්‍රම ව්‍යවස්ථා සංශෝධනයක් හදිසියේ අමාත්‍ය මණ්ඩලයට ඉදිරිපත් කිරීමට අමාත්‍යවරයා කටයුතු කිරීම ද නිදහස් නීතිඥ සංවිධානයේ දැඩි විවේචනයට ලක්ව තිබෙනවා.

මෙම තත්ත්වය හමුවේ ශ්‍රී ලංකා මානව හිමිකම් කොමිෂන් සභාවේ (HRCSL) නිරීක්ෂණ කණ්ඩායමක් වහාම මහර බන්ධනාගාරය වෙත යොමු කරන ලෙස ඉල්ලා සිටින එම සංවිධානය මීගමුව සහ මහර සිදුවීම්වල පුද්ගලික හා දේශපාලනික වගකීම අධිකරණ අමාත්‍යවරයා විසින් භාරගැනීම සිදු කළ යුතුයැයි අවධාරණය කරනවා.

තවද ධුරයේ කටයුතු කිරීමට අපොහොසත් වී ඇති අධිකරණ අමාත්‍ය හර්ෂණ නානායක්කාර වහාම ධුරයෙන් ඉල්ලා අස්වීම, මහර සිදුවීම සම්බන්ධයෙන් ස්වාධීන සහ විනිවිදභාවයෙන් යුතු පරීක්ෂණයක් පැවැත්වීම සහ අධිකරණ අමාත්‍යාංශය සිය ප්‍රමුඛතා නිවැරදි කරගන්නා තෙක් විනිසුරුවරුන්ගේ විශ්‍රාම වයස ඉහළ නැංවීමේ යෝජිත ආණ්ඩුක්‍රම ව්‍යවස්ථා සංශෝධනය වහා හකුලා ගැනීම සිදුකළ යුතු බවද එම නිවේදනයේ සඳහන්.