ළමා ආරක්ෂාවට හානි කළ බවට Meta සමාගමට ඩොලර් මිලියන 567ක තවත් දඩයක්

අමෙරිකාවේ නිව් මෙක්සිකෝ ප්‍රාන්ත අධිකරණයක් විසින් ළමා ආරක්ෂාව සම්බන්ධයෙන් සිය සමාජ මාධ්‍ය තුළින් සිදුවූ හානි පිළිබඳව ප්‍රමාණවත් අනතුරු ඇඟවීම් ලබා නොදුන් බවට තීරණය කරමින් Meta සමාගමට අමෙරිකානු ඩොලර් මිලියන 567ක (පවුම් මිලියන 421ක් පමණ) තවත් දඩයක් නියම කර තිබෙනවා.

මෙය ළමා ආරක්ෂාව සම්බන්ධයෙන් Meta සමාගමට එරෙහිව මෙතෙක් නියම වූ විශාලතම දඩ මුදල ලෙස සැලකෙන අතර, මීට පෙර නියම කළ ඩොලර් මිලියන 375ක දඩය සමග එකතුව සමාගම ගෙවිය යුතු මුළු මුදල ඩොලර් මිලියන 942ක් දක්වා ඉහළ ගොස් ඇති බවයි විදෙස් මාධ්‍ය සඳහන් කරන්නේ.

නිව් මෙක්සිකෝ අධිකරණ විනිසුරු බ්‍රයන් බීඩ්ෂයිඩ් (Bryan Biedscheid) සඳහන් කර ඇත්තේ, Meta සමාගම "මහජනයට කරදරකාරී බලපෑමක්" ඇති කරන ආයතනයක් බවත්, එය වායු දූෂණය සිදු කරන කර්මාන්ත ශාලාවකට සමාන කළ හැකි බවත්.

මෙම නඩුව 2023 වසරේ නිව් මෙක්සිකෝ ප්‍රාන්ත නීතිපතිවරයා විසින් ගොනු කර තිබූ අතර, Facebook, Instagram, WhatsApp සහ Threads ඇතුළු Meta වේදිකාවල නිර්දේශන (Recommendation) මගින් බාලවයස්කරුවන්ට හානිකර අන්තර්ගත සහ ලිංගික අපරාධකරුවන් සමග සම්බන්ධතා ඇතිවීමට ඉඩ සැලසූ බවට චෝදනා එල්ල වී තිබුණා.

අධිකරණ නියෝගයට අනුව, දඩ මුදලින් ඩොලර් මිලියන 420ක් දරුවන්ට සිදුව ඇති මානසික හානි සඳහා ප්‍රතිකාර සහ මනෝසෞඛ්‍ය වැඩසටහන් සඳහා වෙන් කෙරෙන අතර, ඉතිරි මුදල් දැනුවත් කිරීමේ සහ වැළැක්වීමේ වැඩසටහන් සඳහා යොදා ගැනීමට නියමිත බවයි විදෙස් මාධ්‍ය සඳහන් කරන්නේ.

කෙසේ වෙතත්, Meta සමාගම ප්‍රකාශ කර ඇත්තේ මෙම තීන්දුවට එකඟ නොවන බවත්, එය අභියාචනයකට ලක් කරන බවත්.

සමාගම තවදුරටත් සඳහන් කර ඇත්තේ, තම සමාජ මාධ්‍ය වේදිකාවල තරුණ පරිශීලකයන්ගේ ආරක්ෂාව සඳහා විශාල වශයෙන් ආයෝජනය කර ඇති බවයි.

මේ අතර, ලබන සතියේ කැලිෆෝනියාවේදී Meta සමාගමට එරෙහිව තවත් ප්‍රධාන නඩුවක් විභාගයට ගැනීමට නියමිත අතර, අමෙරිකානු ප්‍රාන්ත 30කට අධික සංඛ්‍යාවක නීතිපතිවරුන් ළමා පෞද්ගලිකත්ව නීති උල්ලංඝනය කළ බවට සමාගමට එරෙහිව නඩු පවරා තිබෙනවා.