කුමන්ත්‍රණකරුවන්ට හසු නොවී බන්ධනාගාර ගැටලුවලට විසඳුම් ලැබෙන තෙක් ඉවසන්න – අධිකරණ ඇමතිගෙන් විශේෂ ප්‍රකාශයක්

කූඨ අරමුණු සහිත පුද්ගලයින්ගේ මෙහෙයවීම්වලට හසු වී බන්ධනාගාර තුළ කලබලකාරී තත්ත්වයන් ඇති කර නොගන්නා ලෙසත්, රැඳවියන් මුහුණ දෙන ගැටලුවලට විසඳුම් ලබා දෙන තෙක් ඉවසීමෙන් කටයුතු කරන ලෙසත් අධිකරණ සහ ජාතික ඒකාබද්ධතා අමාත්‍ය, නීතිඥ හර්ෂණ නානායක්කාර රැඳවියන්ගෙන් සහ ඔවුන්ගේ ඥාතීන්ගෙන් ඉල්ලා සිටිනවා.

බන්ධනාගාර කිහිපයක පසුගියදා ඇති වූ නොසන්සුන්කාරී සිදුවීම් සම්බන්ධයෙන් අද (07) පස්වරුවේ අධිකරණ අමාත්‍යාංශයේ පැවැති විශේෂ ප්‍රකාශයකදී අමාත්‍යවරයා මේ බව සඳහන් කළා.

එහිදී වැඩිදුරටත් අදහස් දැක්වූ අමාත්‍යවරයා සඳහන් කළේ, රස පරීක්ෂක වාර්තා ප්‍රමාදයට කඩිනම් විසඳුම් ලෙස රස පරීක්ෂක දෙපාර්තමේන්තුවේ පැවැති පුරප්පාඩු 118න් 70කට ආසන්න ප්‍රමාණයක් සඳහා මේ වන විටත් නව සේවකයින් බඳවා ගැනීමට පියවර ගෙන ඇති බවයි.

මේ මාසය වන විට රස පරීක්ෂණ කටයුතු කඩිනම් කිරීම සඳහා අවශ්‍ය නව යන්ත්‍ර සූත්‍ර ගෙන ඒමට කටයුතු යොදා ඇති බවත් අමාත්‍යවරයා සඳහන් කළා.

ඒ අනුව, ඉදිරියේදී මසකට රස පරීක්ෂක වාර්තා 7,500ත් 9,000ත් අතර ප්‍රමාණයක් නිකුත් කිරීමට නියමිත අතර, එමඟින් ඇප ලබා ගැනීමේදී සිදු වන ප්‍රමාදය අවම වනු ඇති බවත් අමාත්‍යවරයා මෙහිදී සඳහන් කළා.

මත්ද්‍රව්‍යවල ශුද්ධ බර ග්‍රෑම් 10ට වැඩි අවස්ථාවලදී ඇප ලබා ගැනීමට අභියාචනාධිකරණයට යොමු වීමට සිදු වීමෙන් විශාල ප්‍රමාදයක් සිදු වන බව හඳුනාගෙන ඇති බවත්, ඒ අනුව, යම් මත්ද්‍රව්‍ය වැරදි සඳහා මහාධිකරණයෙන්ම ඇප ලබා ගැනීමට හැකි වන පරිදි නීති සංශෝධනය කිරීමේ යෝජනාව ඉදිරියේදී අමාත්‍ය මණ්ඩලයට ඉදිරිපත් කිරීමට නියමිත බවත් අමාත්‍යවරයා මෙහිදී අවධාරණය කළා.