සූගීෂ්වර බණ්ඩාර ලබන 25 දක්වා තවදුරටත් රිමාන්ඩ්

ජනාධිපති වැය ශීර්ෂය යටතේ තනතුරු දෙකක් සඳහා වන වැටුප් මුදල් ලබා ගැනීමේ සිද්ධියක් සම්බන්ධයෙන් රක්ෂිත බන්ධනාගාර ගත කර සිටින හිටපු ජනාධිපති ගෝඨාභය රාජපක්ෂගේ පෞද්ගලික ලේකම් නව ජනතා පෙරමුණේ නායක සූගීෂ්වර බණ්ඩාර ලබන 25 දක්වා තවදුරටත් රක්ෂිත බන්ධනාගාරගත කරන ලෙස කොළඹ අතිරේක මහේස්ත්‍රාත් නුවන් කෞශල්‍ය අද (12) නියෝග කළා.

සැකකරුට ඇප ලබාදීමට තරම් සුවිශේෂී කරුණු ඉදිරිපත් නොවීම මත ඇප ලබාදීම ප්‍රතික්ෂේප කරන බව සඳහන් කළ අධිකරණය, සැකකරු මෙලෙස යළි රක්ෂිත බන්ධනාගාර ගත කළා.

සිද්ධියට අදාලව මධ්‍යම අපරාධ විමර්ශන කාර්යංශය විසින් අධිකරණයට කරුණු ඉදිරිපත් කළා.

සැකකරු වෙනුවෙන් අධිකරණයේ පෙනී සිටි නීතීඥවරයා පවසා සිටියේ තම සේවාදායකයා රක්ෂිත බන්ධනාගාර ගත කළේ ඉකුත් ජුනි 14 වැනිදා බැවින් දැනට දින 54 වඩා බන්ධනාගාර ගතව සිටින බැවින් ඇප මත මුදා හරින ලෙසයි.

තවද තම සේවාදායකයාගේ දියණිය විශාදය රෝගී තත්ත්වයට පත්ව රෝහල් ගතව ප්‍රතිකාර ලබන බවට වෛද්‍ය වර්තා ඇති බැවින් ඇප ලබාදීම සම්බන්ධයෙන් සලකා බලන ලෙසද නීතිඥවරයා අධිකරණයෙන් ඉල්ලා සිටියා.

සිද්ධිය සම්බන්ධයෙන් වැඩිදුරටත් අධිකරණයට කරුණු දක්වමින් නීතිඥවරයා මෙලෙස අධිකරණයට කරුණු ඉදිරිපත් කළා.

ඉදිරිපත් වූ කරුණු සලකා බැලූ මහේස්ත්‍රාත්වරයා සිද්ධියට අදාලව ඇප ලබාදීමට සලකා බලන්නේ අසාමාන්‍ය කරුණු බවත් දියණිය පුතා සහ බිරිඳ සම්බන්ධයෙන් කරන ලද කරුණු සුවිශේෂී කරුණු නොවන බවට සඳහන් කළා.