වියළි කාලගුණය තවමත් - දිස්‍ත්‍රික්ක රැසක් හෙටත් උණුසුම්

දිවයිනේ ප්‍රදේශ කිහිපයක තවදුරටත් තීව්‍ර වෙමින් පවතින වියළි කාලගුණ තත්ත්වය හේතුවෙන් ජනතාව පත්ව ඇත්තේ දැඩි අපහසුතාවයකටයි.

ඒ අනුව උතුර, උතුරු මැද, නැගෙනහිර මෙන්ම මොණරාගල දිස්ත්‍රික්කයේ ජනතාව පවතින වියළි කාළගුණ තත්ත්වය හේතුවෙන් තවදුරටත් පීඩාවට පත්ව සිටිනවා.

මේ අතර, වව්නියාව, මුලතිව්, ත්‍රිකුණාමලය, පොළොන්නරුව, මඩකලපුව, අම්පාර සහ මොණරාගල දිස්ත්‍රික්කවල ඇතැම් ප්‍රදේශවල හෙට දිනයේදීත් මිනිස් සිරුරට දැනෙන උණුසුම අවදානය යොමු කළ යුතු මට්ටමක පැවතිය හැකි බවයි කාලගුණ විද්‍යා දෙපාර්තමේන්තුව නිවේදනය කළේ.

එවන් පසුබිමක ජලාශවල ජල මට්ටම් පහල යාම හමුවේ ඇතැම් ප්‍රදේශවල පානීය ජල අර්බුදයක් ද නිර්මාණය වී තිබෙනවා.

පොළොන්නරුව දිස්ත්‍රික්කයේ හිඟුරක්ගොඩ ප්‍රාදේශීය ලේකම් කොට්ඨාසයට අයත් සිංහගම කළු උල්පත් වැව සිඳීයාමෙන් එම ප්‍රදේශයේ ධීවරයන් සහ ගොවීන් මෙන්ම කිරි ගොවීන් ද දැඩි අපහසුතාවයට ලක්ව සිටිනවා.

ඔවුන් පෙන්වා දෙන්නේ මේ සම්බන්ධයෙන් බලධාරින් මැදිහත්ව විධිමත් ක්‍රියාමාර්ග ගන්නා ලෙසයි.

කෙසේ වෙතත්, පවතින වියළි කාළගුණය අවසන් කිරීමට ප්‍රමාණවත් වන පරිදි වර්ෂාපතනයක් ඔක්තෝබර් මාසයේ සිට ලැබෙනු ඇතැයි අපේක්ෂා කරන බවයි කාලගුණ විද්‍යා දෙපාර්තමේන්තුවේ අනාවැකිකරන අංශයේ අධ්‍යක්ෂ මෙරිල් මෙන්ඩිස් කියා සිටියේ.