ෆේස්බුක් ආයතනය AI මෙවලම් සහිත Creator Studio ස්වාධීන යෙදුම එළිදක්වයි

ෆේස්බුක් ආයතනය පසුගිය බදාදා දින ක්‍රියේටර් ස්ටූඩියෝ ඇප් (Creator Studio app) නමින් ස්වාධීන යෙදුමක් එළිදක්වන බව නිවේදනය කර තිබෙනවා.

මෙය AI මගින් ක්‍රියාත්මක වන යෙදුමක් වන අතර, නිර්මාණකරුවන්ට ඔවුන්ගේ ප්‍රේක්ෂක පිරිස වර්ධනය කර ගැනීමට පුද්ගලීකරණය කළ උපදෙස් ලබා දෙන අතර, ඔවුන්ගේ ප්‍රජාවන් සමග සම්බන්ධ වීමට නව මෙවලම් ද සපයන බව සඳහන්.

ෆේස්බුක් සමාගම විසින් තෝරාගත් පිරිසක් සමග මෙම යෙදුම පරීක්ෂා කිරීම ආරම්භ කර සති කිහිපයකට පසුව, නිල වශයෙන් iOS මෙහෙයුම් පද්ධතිය සඳහා මෙය හඳුන්වා දෙනු ඇති බවයි වාර්තා වෙන්නේ.

ෆේස්බුක් හි AI ක්‍රියේටර් සහායක මෙම නව යෙදුම තුළම අන්තර්ගත කර තිබෙනවා.

එය ක්‍රියේටර්වරුන්ගේ අන්තර්ගත රටාව, කාර්ය සාධනය, ප්‍රේක්ෂක සම්බන්ධතාවය සහ අරමුණු මත පදනම්ව පුද්ගලීකරණය කළ නිර්දේශ ලබා දීමට කටයුතු කරනවා.

නිර්මාණකරුවන්ට බොහෝ විට තම කාර්ය සාධනය අවබෝධ කර ගැනීම සඳහා ප්‍රස්ථාර සහ උපකරණ පුවරු (dashboards) පරීක්ෂා කිරීමට සිදු වෙනවා.

නමුත් මෙම AI සහායකයා සමග, ඔවුන්ට "මා පෝස්ට් එකක් පළ කළ යුත්තේ කවදාද?" සහ "මගේ අදහස් දැක්වීම්වල මිනිසුන් පවසන්නේ කුමක්ද?" වැනි ප්‍රශ්නවලට ඉක්මන් පිළිතුරු ලබා ගත හැකියි.

මෙම නව ක්‍රියේටර් ස්ටූඩියෝ යෙදුමට ප්‍රවේශය ලබා දීමෙන්, ටික්ටොක් (TikTok) සහ යූටියුබ් (YouTube) වැනි ප්‍රතිවාදීන් සමග තරඟ කරන අතරතුර, මෙටා සමාගම ක්‍රියේටර්වරුන් ෆේස්බුක් තුළ සක්‍රියව තබා ගැනීමට බලාපොරොත්තු වෙනවා.

අන්තර්ගත අදහස් සහ කාර්ය සාධනය විශ්ලේෂණය කිරීම සඳහා ChatGPT වැනි තෙවැනි පාර්ශවීය මෙවලම් මත යැපීම අඩු කිරීමට ද සමාගම උත්සාහ කරනවා විය හැකි බවයි විදෙස් මාධ්‍ය පෙන්වා දෙන්නේ.

ක්‍රියේටර් ස්ටූඩියෝ යෙදුමට නව විශේෂාංග කිහිපයක් ඇතුළත්.

ඒවා අතර, වඩාත්ම වැදගත් අදහස් දැක්වීම් ඉස්මතු කරන සහ ක්‍රියේටර්ගේම ස්වරයෙන් පිළිතුරු කෙටුම්පත් කරන AI බලයෙන් ක්‍රියාත්මක වන අදහස් දැක්වීමේ මෙවලමක් ද තිබෙනවා.

ෆේස්බුක් පවසන පරිදි, ක්‍රියේටර්වරුන්ට යෝජිත පිළිතුරු පල කිරීමට පෙර ඒවා සංස්කරණය කර අනුමත කළ හැකියි.

මීට අමතරව, ක්‍රියේටර්වරුන් සෑම දිනකම යෙදුම විවෘත කරන විට, ඔවුන්ගේ නවතම පෝස්ට් එකේ කාර්ය සාධනය සමාලෝචනය කිරීම, ඔවුන්ගේ අරමුණු කරා යන ප්‍රගතිය නිරීක්ෂණය කිරීම සහ පිළිතුරක් අවශ්‍ය අදහස් දැක්වීම් සලකුණු කිරීම ඇතුළුව, දෛනික ප්‍රමුඛතා පිළිබඳ තොරතුරු දැකගත හැකි වනු ඇති.

ක්‍රියේටර් ස්ටූඩියෝ එක්සත් ජනපදය සහ කැනඩාව තුළ iOS මෙහෙයුම් පද්ධතිය භාවිතා කරන සියලුම ක්‍රියේටර්වරුන් සඳහා ලබා ගත හැකි බව සඳහන්.

මෙම නව යෙදුම මෙටා සමාගමේ මෑතකාලීන එකම එළිදැක්වීම නොවන අතර සමාගම මෑත මාසවලදී නිෂ්පාදන රැසක් එළිදක්වා තිබෙනවා.

මෙම තාක්ෂණික දැවැන්තයා මෑතකදී Reddit හි ආකාරයටම ක්‍රියාත්මක වන ෆේස්බුක් සමූහ (Facebook Groups) සඳහා Forum නමින් ස්වාධීන යෙදුමක් ද, පරිශීලකයින්ට ඉන්ස්ටග්‍රෑම් මිතුරන් සමග අතුරුදහන් වන ඡායාරූප බෙදා ගැනීමට ඉඩ සලසන Instants නමින් යෙදුමක් ද, Pocket නමින් ක්‍රීඩා යෙදුමක් ද, AI මගින් නිර්මාණය කරන ලද ළමා කතා නිර්මාණය කරන StoryKit නමින් AI කතා කීමේ යෙදුමක් ද නිකුත් කළා.