ප්‍රදේශ රැසක් තවදුරටත් වියළෙයි, පානීය ජලයත් දැඩි අර්බුදයක - මානසික සෞඛ්‍යයටත් බලපෑම්

මිනිස් සිරුරට දැනෙන උෂ්ණත්වය, දිවයිනේ දිස්ත්‍රික්ක කිහිපයක අද දිනයේදී අවධානය යොමු කළයුතු මට්ටමක් දක්වා ඉහළ යනු ඇති බව කාලගුණ විද්‍යා දෙපාර්තමේන්තුව පවසනවා.

වව්නියාව, මුලතිව්, ත්‍රිකුණාමලය, පොළොන්නරුව, මඩකලපුව, අම්පාර සහ මොණරාගල යන දිස්ත්‍රික්කවල මෙම තත්ත්වය අපේක්ෂා කරන බවත් එම දිස්ත්‍රික්ක වල උෂ්ණත්වය සෙල්සියස් අංශක 39ත් 45ත් අතර අගයක් ගනු ඇති බවත් නිවේදනයක් නිකුත් කරමින් එම දෙපාර්තමේන්තුව ප්‍රකාශ කළා.

ඒ අනුව එළිමහනේ අධික වෙහෙසකාරී කටයුතු සීමා කරන ලෙස හා ප්‍රමාණවත් පරිදි ජලය පානය කිරීම සිදුකළ යුතු බව ඊයේ කොළඹදී ප්‍රවෘත්ති සාකච්ඡාවක් කැඳවමින් රජයේ වෛද්‍ය නිලධාරින්ගේ සංගමයේ සහකාර ලේකම් වෛද්‍ය හංසමාල් වීරසුරිය ජනතාවගෙන් ඉල්ලා සිටියා.

ඇතැම් ප්‍රදේශවල පානීය ජල හිඟයක් ද පවතින අතර කෘෂිකර්මාන්තයට මෙන්ම දෛනික ජන ජීවිතයටද උද්ගතව ඇත්තේ ගැටලුකාරී තත්ත්වයක්.

එවන් පසුබිමක මිහින්තලේ ප්‍රදේශයට පවතින අධික වියලි කාලගුණය හේතුවෙන්, මිහින්තලය පුනා වැව, සුරුක්කුලම වැව, කෝන් වැව සහා වෙරුප්පන්කුලම පංසල් වැව ආදී වැව්වල ජලය සිදී යාම ආරම්භ වී ඇති බවයි හිරු වාර්තාකරු පැවසුවේ.

මේ අතර වැල්ලවායේ කුඩා වැව් රැසක ජල මට්ටම අවම වී ඇති අතර වැල්ලවාය - දිවුල්ගස් කනත්ත වැවෙහි ජල මට්ටමද අඩුව තිබෙනවා.

මේ අතර මඩකලපුව, මොණරාගල , රත්නපුර සහ අම්පාර දිස්ත්‍රික්කවල පානීය ජල ගැටලු පවතින ප්‍රදේශවලට බව්සර් මගින් ජලය බෙදාහැරීමේ කටයුතු සිදු කරන බව නිවාස, ඉදිකිරීම් සහ ජලසම්පාදන නියෝජ්‍ය අමාත්‍ය සුසිල් රණසිංහ පවසනවා. නියෝජ්‍ය අමාත්‍යවරයා වැඩිදුරටත් ප්‍රකාශ කළේ මේ වනවිට ජල සම්පාදන මණ්ඩලය සතු ජල මූලාශ්‍රවල ජල අඩුවක් නොමැති බවයි.

එමෙන්ම පවතින වියළි කාළගුණය අවසන් කිරීමට ප්‍රමාණවත් වන පරිදි වර්ෂාපතනයක් ඔක්තෝබර් මාසයේ සිට ලැබෙනු ඇතැයි අපේක්ෂා කරන බව කාලගුණ විද්‍යා දෙපාර්තමේන්තුවේ අනාවැකිකරන අංශයේ අධ්‍යක්ෂ මෙරිල් මෙන්ඩිස් ප්‍රකාශ කළා.

එවන් පසුබිමක රාගම වෛද්‍ය පීඨයේ ළමා හා යොවුන් මනස පිළිබඳ විශේෂඥ වෛද්‍ය මහාචාර්ය මියුරු චන්ද්‍රදාස පවසන්නේ පවතින උණුසුම් කාලගුණ තත්ත්වය සමග විශාදය වැනි රෝග උත්සන්න වීමේ හැකියාවක් පවතින බවයි.