ව්‍යාජ SLS ප්‍රමිති ලාංඡනය යෙදූ පානීය ජල බෝතල් 8,500කට ආසන්න තොගයක් : පාරිභෝගික අධිකාරිය භාරයට

ව්‍යාජ ලෙස ශ්‍රී ලංකා ප්‍රමිති ලාංඡනය (SLS) යොදා වෙළෙඳපොළට නිකුත් කිරීමට සූදානම් කර තිබුණු පානීය ජල බෝතල් 8,500කට ආසන්න තොගයක් පාරිභෝගික අධිකාරිය භාරයට ගෙන තිබෙනවා.

පාරිභෝගික කටයුතු පිළිබඳ අධිකාරියේ නිලධාරීන් විසින් අවිස්සාවේල්ල ප්‍රදේශයේ සිදු කළ විශේෂ වැටලීමකදී මෙම පානීය ජල බෝතල් 8,500කට ආසන්න තොගය සිය භාරයට ගත් බවයි පාරිභෝගික අධිකාරිය පවසන්නේ.

අදාල පානීය ජලය අමිතිරිගල, රුවන්වැල්ල ප්‍රදේශයේ පිහිටි නිෂ්පාදනාගාරයක නිෂ්පාදනය කර, අවිස්සාවේල්ල ප්‍රදේශයේ පිහිටි ගබඩාවක ගබඩා කර තිබුණු බවයි මූලික විමර්ශනවලදී අනාවරණය වී ඇත්තේ.

එම ගබඩාව පරීක්ෂා කිරීමේදී මිලිලීටර් 500 සිට ලීටර් 19 දක්වා විවිධ ප්‍රමාණවලින් යුත් පානීය ජල බෝතල්වල, SLS ප්‍රමිති ලාංඡනය සහ සහතික අංක 894 ව්‍යාප් ලෙස සඳහන් කර තිබුණු බව නිලධාරීන් විසින් අනාවරණය කරගෙන තිඛෙන බවයි පාරිභෝගික අධිකාරිය පවසන්නේ.

මෙම පානීය ජල බෝතල් තොගය ඒ වන විටත් වෙළෙඳපොළට නිකුත් කර නොතිබුණු අතර, එය වෙළෙඳපොළට නිකුත් කිරීම සඳහා සූදානම් කර තිබූ තොගයක් බවයි විමර්ශනවලදී හෙළි වී ඇත්තේ.

අදාළ ජල බෝතල් 8,500කට ආසන්න ප්‍රමාණය නිලධාරීන් විසින් මුද්‍රා තබා සිය භාරයට ගෙන ඇති අතර, වැඩිදුර විමර්ශන අවසන් කිරීමෙන් පසු, වගකිව යුතු පාර්ශ්වයන්ට එරෙහිව නීතිමය ක‍ටයුතු ගැනීමට නියමිත බවයි වැඩිදුරටත් සදහන් වන්නේ.