ෂෙබාස් ශරීෆ්ගේ රජයට එරෙහිව ඉම්රාන් ඛාන්ගේ පක්ෂයෙන් අධිකරණයට පෙත්සමක්

පාකිස්ථානයේ හිටපු අග්‍රාමාත්‍ය ඉම්රාන් ඛාන් පෞද්ගලික රෝහලකට ඇතුළත් කරන ලෙස ශ්‍රේෂ්ඨාධිකරණය නියෝග කර තිබියදී, ඔහු රජයේ රෝහලකට ඇතුළත් කිරීමට පියවර ගැනීම සම්බන්ධයෙන් ෂෙබාස් ෂරීෆ්ගේ රජයට එරෙහිව අධිකරණයට අපහාස කිරීමේ පෙත්සමක් ගොනු කිරීමට ඔහුගේ පක්ෂය පියවර ගෙන තිබෙනවා.

73 හැවිරිදි වියේ පසුවන ඉම්රාන් ඛාන් වෙනුවෙන් වෛද්‍යවරුන් නිර්දේශ කළ පරීක්ෂණයක් ලබාදීමට කටයුතු නොකිරීම පිළිබඳවද 'පාකිස්ථාන් තෙහ්රීක්-ඊ-ඉන්සාෆ්' (PTI) පක්ෂය රජයේ පකිස්ථාන වෛද්‍ය විද්‍යා ආයතනයට දැඩි ලෙස චෝදනා කර ඇති බවයි වාර්තා වෙන්නේ.

එම රෝහල් පරිශ්‍රයේ ක්‍රියාකාරී මට්ටමේ පවතින CT ස්කෑනර් යන්ත්‍රයක් තිබියදීත් මෙම පරීක්ෂණය සිදු නොකළ බව Dawn පුවත්පත වාර්තා කර තිබෙනවා.

අග්‍රාමාත්‍යවරයාට, නීති අමාත්‍යවරයාට, තොරතුරු අමාත්‍යවරයාට සහ අනෙකුත් රාජ්‍ය නිලධාරීන්ට එරෙහිව පියවර ගන්නා ලෙස ඉල්ලමින් මෙම පෙත්සම ගොනු කර ඇතැයි ඉම්රාන් ඛාන්ගේ පක්ෂයේ නීති උපදේශක නයීම් පන්ජුතා පවසා සිටියේ.

ඉම්රාන් ඛාන්ට හෘද රෝගී සංකූලතා ඇතිවීමේ අවදානමක් පවතින බවට හෘද රෝග විශේෂඥ වෛද්‍යවරුන් අනතුරු අඟවා තිබියදීත්, ඔහුට අවශ්‍ය CT Coronary Angiography (CTA) පරීක්ෂණය සිදුකිරීමට පකිස්ථාන වෛද්‍ය විද්‍යා ආයතනයේ බලධාරීන් අඛණ්ඩව අපොහොසත් වී ඇතැයි PTI පක්ෂයේ මධ්‍යම තොරතුරු ලේකම් ෂෙයික් වකාස් අක්‍රම් චෝදනා කර සිටියා.

එබැවින් ඛාන් වහාම 'ෂිෆා ඉන්ටර්නැෂනල්' පෞද්ගලික රෝහල වෙත යොමු කර අදාළ පරීක්ෂණය සිදුකරන ලෙසද ඔහු වැඩිදුරටත් ඉල්ලා සිටියේ.