ඩුබායි-ඉන්දියා වෙළඳාම වාර්තාගත ලෙස ඉහළට

එක්සත් ආරාබි එමීර් රාජ්‍යය සහ ඉන්දියාව අතර ආර්ථික සබඳතා තවදුරටත් ශක්තිමත් කරමින්, 2025 වසරේදී ඩුබායි සහ ඉන්දියාව අතර සිදු වූ තෙල් නොවන සමස්ත වෙළෙඳාම එක්සත් ආරාබි එමීර් රාජ්‍ය ඩිරාම් බිලියන 222.5 ක (අමෙරිකානු ඩොලර් බිලියන 60.6) වාර්තාගත අගයක් වාර්තා කිරීමට සමත්ව තිබෙනවා.

විදෙස් මාධ්‍ය වාර්තා කළේ, මෙය පෙර වසරට වඩා 15% ක වාර්ෂික වර්ධනයක් බවයි.

මේ අතර, 2026 ජූනි මස අග වන විට ඩුබායි වාණිජ මණ්ඩලයේ සක්‍රීය සාමාජිකයින් ලෙස ලියාපදිංචි වී ඇති ඉන්දියානු සමාගම් සංඛ්‍යාව 85,841 දක්වා ඉහළ ගොස් තිබෙනවා.

එමෙන්ම, 2016 සිට 2025 දක්වා කාලසීමාව තුළදී පමණක් ඩුබායි රාජ්‍යය වෙත අමෙරිකානු ඩොලර් බිලියන 8.8 ක (ඩිරාම් බිලියන 32.3) ඉන්දියානු ආයෝජන ආකර්ෂණය කර ගැනීමට හැකි වී තිබීම විශේෂත්වයක්.

නවදිල්ලි නුවරදී පැවැත්වුණු 2026 ‘දි ඉකොනොමික් ටයිම්ස් ලෝක නායකයින්ගේ සමුළුව’ (The Economic Times World Leaders Forum 2026) අතරතුර පැවැති සාකච්ඡා මණ්ඩපයකදී ඩුබායි වාණිජ මණ්ඩලයේ සභාපති සහ ප්‍රධාන විධායක නිලධාරී මොහොමඩ් අලි රාෂිඩ් ලූටා විසින් දෙරට අතර පවතින මෙම දැවැන්ත ආර්ථික සබඳතාවයේ ප්‍රගතිය තහවුරු කරන ලද අතර, ඉන්දීය අග්‍රාමාත්‍ය නරේන්ද්‍ර මෝදිගේද සහභාගීත්වයෙන් පැවැත්වුණු මෙම උත්සවය සඳහා ඉන්දියාවේ සහ ලොව පුරා ප්‍රමුඛ පෙළේ ආයෝජකයින් මෙන්ම ජ්‍යෙෂ්ඨ විධායක නිලධාරීන් රැසක් එක්ව සිටියා.

එහිදී අදහස් දැක්වූ ලූටා වැඩිදුරටත් සඳහන් කළේ, 2025 වසරේදී ඩුබායි සහ ඉන්දියාව අතර සිදු වූ තෙල් නොවන වෙළෙඳාම ඩිරාම් බිලියන 222.5 ක (ඇමෙරිකානු ඩොලර් බිලියන 60.6) සන්ධිස්ථානයක් සනිටුහන් කරමින් වසරින් වසර 15% ක වර්ධනයක් පෙන්නුම් කළ බවයි.