අමෙරිකානු විශ්වවිද්‍යාලවල ප්‍රමුඛ පර්යේෂකයන් රැසක් කැනඩාවට

අමෙරිකානු විශ්වවිද්‍යාලවල සේවය කරන ප්‍රමුඛ පෙළේ පර්යේෂකයන් රැසක් කැනඩාවේ විශ්වවිද්‍යාල වෙත බඳවා ගැනීමට එරට රජය පියවර ගෙන තිබෙනවා.

ඒ අනුව ලොව පුරා සිටින පර්යේෂකයන් 64 දෙනෙකු කැනඩාවට ගෙන්වා ගැනීමට නියමිත අතර, ඉන් 48 දෙනෙකුම අමෙරිකාවෙන් පැමිණෙන පර්යේෂකයන් බවයි විදෙස් මාධ්‍ය වාර්තා කරන්නේ.

කැනඩා රජයේ නව වැඩසටහනක් යටතේ ඔවුන්ගේ පර්යේෂණ සඳහා කැනේඩියානු ඩොලර් මිලියන 504ක මුදල් ප්‍රතිපාදන වෙන් කර ඇති බව සඳහන්.

මේ අතර, අමෙරිකානු ජනාධිපති ඩොනල්ඩ් ට්‍රම්ප්ගේ පරිපාලනය විශ්වවිද්‍යාල සම්බන්ධයෙන් දැඩි ප්‍රතිපත්ති අනුගමනය කිරීමත් සමග එරට පර්යේෂණ අරමුදල් රැසක් අත්හිටුවීම හේතුවෙන් විද්‍යාඥයන්ට පවතින අවිනිශ්චිතතාවය ඉහළ ගොස් ඇති බවයි විදෙස් මාධ්‍ය සඳහන් කරන්නේ.

ඒ හේතුවෙන් වෙනත් රටවල විශ්වවිද්‍යාල වෙතින් ලැබෙන රැකියා සහ පර්යේෂණ අවස්ථා අමෙරිකානු පර්යේෂකයන්ට වඩාත් ආකර්ෂණීය වී ඇති බව විදෙස් මාධ්‍ය වාර්තා කරනවා.

මේ අතර, ලොව ඉහළම ශ්‍රේණිගත විශ්වවිද්‍යාල අතර තවදුරටත් අමෙරිකානු විශ්වවිද්‍යාල ප්‍රමුඛස්ථානයක සිටියද, ෆෙඩරල් සහ ප්‍රාන්ත මට්ටමේ පර්යේෂණ අරමුදල් කප්පාදු කිරීම හේතුවෙන් එරට විශ්වවිද්‍යාල දැඩි අර්බුදයකට මුහුණ දී ඇති බව විද්වතුන් පෙන්වා දෙනවා.

විදෙස් මාධ්‍ය අනුව, විශේෂඥයන් සඳහන් කර ඇත්තේ කෙටි කාලීනව පර්යේෂකයන් අහිමිවීමකට වඩා, දැනුම හා නවෝත්පාදන සෙවීම සඳහා අමෙරිකාව අඩු ආකර්ෂණීය රටක් බවට පත්වීමේ අවදානම මෙහිදී වඩාත් බරපතළ බවයි.