බර්ටි ගුණතිලක 93 වන ජන්ම දිනය සමරයි

බර්ටි ගුණතිලක, ඇනස්‌ලි ඩයස්‌, සැමුවෙල් රොඩ්රිගූ තුන් කට්ටුව ගුවන් විදුලිය, වේදිකාව මෙන්ම පසුව රුපවාහිනිය හරහා රට ම සිනා සාගරයක ගිල් වූ අවධියයි.

ඔවුන් සමග සිටි මර්සි එදිරිසිංහ ද එහි දී අමතක කළ නොහැකි චරිතයක්.

අද අගෝස්තු 02 වනදා බර්ටි ගුණතිලකයන්ගේ 93 වන ජන්ම දිනයයි.

උපන් දිනය දා ගොඩකවෙල ඔහුගේ නිවසට ගොඩ වූ හිරුට පුංචි උපන් දින සැමරුමකටත් එක වීමට අවස්තාව ලැබුනා.

ගතින් දුබලව සිටියත්, ඔහුගේ හාස්‍ය තවමත් තරුණ බව නොකියාම බැහැ.

ඔහුගේ විකට කලාවේ අමතක නොවන හස්‍යයෝත්පාදනයක් වන්නේ  "ඌ මට ගැහැව්වා. මට ඌ ගැහැව්වා"  යනුවෙන් කියවුන විනෝද සමය වැඩසටහනයි.

1954 ගුවන් විදුලියේ ආරම්භ වූ විහිළු තහළු වැඩසටහනේ තුන් කට්‌ටුවෙන් අද ජීවත්ව සිටින එකම සාමාජිකයා වන්නේ ද  බර්ටි ගුණතිලකයි.

මහනුවර උපන් ඔහු කුලියාපිටිය ගල්පොල විද්‍යාලයේ උප ගුරුවරයකු වශයෙන් සේවය කර සිංහල බෞද්ධයා පත්තරයේ සෝදුපත් කියවන්නකු ලෙස කාලයක්‌ කටයුතු කළා.

1951 වර්ෂයේ බණ්‌ඩා නගරයට පැමිණීම චිත්‍රපටයෙන් සිනමාවට පිවිසි බර්ටි සිකුරු ලියා, ජීවන ගංගා, සමාජ සතුරෝ, චූඩා මාණික්‍යය. සමුගනිමි සැමියනි, ශීත සමීරේ ඇතුළු චිත්‍රපට හැටක පමණ රඟපෑවා.

මතක් කරමින් සිනාසිය හැකි විහිළුවෙන් රටක මිනිසුන්ගේ ආයුෂ වැඩි කළ ඔහුට හිරු, ආයුබෝ වේවා යි ප්‍රර්ථනා කරන්නෙමු.