රමේෂ් නිශාන් මිනෝද් සධීර දස්කම් අතරට : Hayleys කණ්ඩායම අවසන් මහා තරගයට

වෙළෙඳ සේවා ක්‍රිකට් සංගමය (MCA) විසින් සංවිධානය කරනු ලබන MCA Super Premier League විස්සයි විස්ස ක්‍රිකට් තරගාවලියේ පළමු අවසන් පූර්ව තරගයෙන් කඩුලු 6ක පහසු ජයක් ලබා ගැනීමට Hayleys Group A කණ්ඩායම සමත් වී තිබෙනවා.

කාසියේ වාසිය දිනාගත් Hayleys Group A නායක රමේෂ් මෙන්ඩිස්ගේ ආරාධනාව අනුව පළමුවෙන් පන්දුවට පහර දීමට පිටියට පිවිසි Maliban Biscuits A කණ්ඩායමට පන්දුවාර 19.4ක් අවසානයේ සියලුම දෙනා දැවී රැස් කර ගත හැකි වූයේ ලකුණු 122ක් පමණයි.

එම ඉනිමේ වැඩිම ලකුණුලාභියා වූ ධනංජය ලක්ෂාන් පන්දු 49කට මුහුණ දෙමින් හතරේ පහර 3ක් සහ හයේ පහර 2ක් සමඟින් ලකුණු 49ක් ලබා ගත්තා. ඔහුට අමතරව සහන් ආරච්චිගේ ලකුණු 16ක් ලබා ගත්තා.

පන්දු යැවීමේදී Hayleys Group A නායක රමේෂ් මෙන්ඩිස් ලකුණු 14කට කඩුලු 3ක් දවා ගනිමින් ඉනිමේ හොඳම පන්දු යැවීම වාර්තා කළා. කවිශ්ක අංජුල ලකුණු 26කට කඩුලු 3ක් ද, ට්‍රෙවීන් මැතිව් කඩුලු ද්විත්වයක් සහ ප්‍රභාත් ජයසූරිය කඩුල්ලක් ද දවා ගත්තා.

ලකුණු 123ක ජයග්‍රාහී ඉලක්කයක් හඹා ගිය Hayleys Group A කණ්ඩායම, තවත් පන්දු 20ක් ඉතිරිව තිබිය දී කඩුලු 4ක් පමණක් දැවී එම ඉලක්කය පසු කිරීමට සමත් වුණා.

ඉනිම ආරම්භ කළ නිශාන් මදුශ්ක සහ සදීර සමරවික්‍රම පළමු කඩුල්ල වෙනුවෙන් පන්දු 41ක දී ලකුණු 54ක හොඳ සබඳතාවක් ගොඩනැඟූවා.

සදීර සමරවික්‍රම හතරේ පහර 4ක් සමඟින් ලකුණු 23ක්, නිශාන් මදුශ්ක පන්දු 28කට මුහුණ දෙමින් හතරේ පහර 2ක් සහ හයේ පහර 3ක් සමඟින් ලකුණු 41ක් ලබා ගත්තා.

Maliban Biscuits A ක්‍රීඩකයෝ නුවනිඳු ප්‍රනාන්දු සහ මිනෝද් භානුක පන්දු 5ක් තුළ දවා ගනිමින් තරගයේ වාසිය තමන් වෙතට නතු කර ගැනීමට උත්සාහ කළ ද, Hayleys Group A නායක රමේෂ් මෙන්ඩිස් පන්දු 11කට මුහුණ දෙමින් හතරේ පහරක් සහ හයේ පහර 2ක් සමඟින් නොදැවී ලකුණු 20ක් ලබා ගනිමින් කණ්ඩායම ජයග්‍රහණය කරා ගෙන ගියා.

මිනෝද් භානුක හයේ පහර 3ක් සමඟින් ලකුණු 28ක් ලබා ගත්තා.

Maliban Biscuits A කණ්ඩායම වෙනුවෙන් දුශාන් හේමන්ත ලකුණු 28කට කඩුලු 3ක් දවා ගැනීමට සමත් වුණා.

මෙම ජයග්‍රහණයත් සමඟින් Hayleys Group A කණ්ඩායම තරගාවලියේ අවසන් මහා තරගයට සුදුසුකම් ලබා ගැනීමට සමත්ව සිටිනවා.