அமேசான் ஊழியர் ட்ரம்ப் உருவ பொம்மையின் தொப்பியை அகற்றியதாக சர்ச்சை

அமெரிக்காவில் அமேசான் நிறுவன ஊழியர் ஒருவர், வர்த்தக நிலையம் ஒன்றில் வைக்கப்பட்டிருந்த ஜனாதிபதி டொனால்ட் ட்ரம்ப்பின் உருவ பொம்மையில் இருந்த தொப்பியை அகற்றியதாகக் கூறி நபரொருவர் பகிரந்த காணொளியொன்று சமூக வலைத்தளங்களில் வைரலாகி பெரும் சர்ச்சையை ஏற்படுத்தியுள்ளது.

"வர்த்தக நிலையத்திலுள்ள ட்ரம்ப் உருவ பொம்மையின் தொப்பியை அமேசான் ஊழியர் ஒருவர் தட்டிவிடும் காட்சி பாதுகாப்பு கெமராவில் சிக்கியுள்ளது" என்ற குறிப்புடன் பகிரப்பட்ட இந்த காணொளி, குறுகிய காலத்துக்குள் சுமார் 79,500க்கும் அதிகமான பார்வைகளைப் பெற்று பயனர்களிடையே கடுமையான விவாதங்களை ஏற்படுத்தியுள்ளது.

இந்தச் சம்பவம் குறித்து சமூக வலைத்தள பயனர்கள் இருவேறு கருத்துக்களை வெளிப்படுத்தி வருகின்றனர்.

மற்றொருவரின் உடைமையில் அத்துமீறுவது ஒழுங்கு நடவடிக்கை எடுக்கப்பட வேண்டிய ஒரு செயல் என வாதிடும் ஒரு தரப்பினர், இந்த விவகாரத்தில் அமேசான் நிறுவனம் உரிய நடவடிக்கை எடுக்க வேண்டும் என வலியுறுத்துகின்றனர்.

மறுபுறம், இது ஒரு சுதந்திர நாடு என்பதால் தொழிலாளர்கள் யாரை விரும்ப வேண்டும் என்பதை நிறுவனங்கள் கட்டுப்படுத்தக் கூடாது என்றும், வைரலாகும் ஒரு சிறு காணொளியை மட்டும் வைத்துக்கொண்டு ஒருவரை வேலையை விட்டு நீக்கக் கோருவது தவறானது என்றும், நிறுவனங்கள் முழுமையான உண்மைகளை ஆய்வு செய்ய வேண்டும் என்றும் மாற்றுக்கருத்துக்கள் முன்வைக்கப்படுகின்றன.

சமீபகாலமாக, அரசியல் ரீதியான இத்தகைய வைரல் காணொளிகள் சம்பந்தப்பட்ட நபர்களுக்கு எதிராக கடுமையான ஒழுங்கு நடவடிக்கைகளைக் கோரும் பிரசாரங்களாக மாறுவது அதிகரித்து வருகிறது.

இருப்பினும், இந்தச் சம்பவத்தின் பின்னணியிலுள்ள முக்கிய உண்மைகள் இன்னும் உறுதிப்படுத்தப்படவில்லை.

காணொளியில் இருக்கும் நபர் அமேசான் நிறுவனத்தில் தான் பணிபுரிகிறாரா அல்லது அவரது வேலை நிலை என்ன என்பது குறித்து அமேசான் நிறுவனமோ அல்லது சம்பந்தப்பட்ட நபரோ இதுவரை எந்தவொரு கருத்தும் தெரிவிக்கவில்லை.

தற்போதைய நிலையில், அந்த நபர் அமேசானில் பணிபுரிகிறார் என்பதற்கோ, அவர் மீது ஏதேனும் புகார் அளிக்கப்பட்டுள்ளதா அல்லது ஒழுங்கு நடவடிக்கை எதுவும் பரிசீலனையில் உள்ளதா என்பதற்கோ எந்தவொரு பொதுவான ஆதாரமும் இல்லை என்பது குறிப்பிடத்தக்கது