பங்களாதேஷின் உணவுப் பாதுகாப்பு குறித்து சர்வதேச அறிக்கை எச்சரிக்கை: 1.6 கோடி மக்கள் பாதிப்பு

பங்களாதேஷ் தற்போது பாரிய பஞ்சத்தையோ அல்லது பாரிய அளவிலான உணவுப் பற்றாக்குறையையோ எதிர்கொள்ளவில்லை என்ற போதிலும், உணவுப் பாதுகாப்பின்மை நிலவும் உலகின் மோசமான 10 நாடுகளின் பட்டியலில் அது உள்வாங்கப்பட்டுள்ளது.

2025 ஆம் ஆண்டின் உச்சக்கட்டத்தின் போது, பங்களாதேஷில் சுமார் 1.6 கோடி மக்கள் கடுமையான உணவுப் பாதுகாப்பின்மையை எதிர்கொண்டுள்ளனர். இதில் 1.56 கோடி மக்கள் நெருக்கடி நிலையிலும், 4 இலட்சம் மக்கள் அவசர நிலையிலும் இருந்துள்ளனர்.

இந்த எண்ணிக்கை நாட்டின் மொத்த மக்கள் தொகையில் 17 சதவீதத்தை பிரதிநிதித்துவப்படுத்துகிறது. எனினும், இந்த அறிக்கையானது பங்களாதேஷின் மொத்த மக்கள் தொகையில் 59 சதவீதமானோரை மாத்திரமே ஆய்வுக்கு உட்படுத்தித் தயாரிக்கப்பட்டுள்ளது.

அத்துடன், 2024 ஆம் ஆண்டுடன் ஒப்பிடுகையில், 2025 இல் கடுமையான உணவுப் பாதுகாப்பின்மையை எதிர்கொண்டவர்களின் எண்ணிக்கை 76 இலட்சத்தால் குறைந்துள்ளது.

2025 இன் முற்பகுதியில் பாரிய இயற்கை அனர்த்தங்கள் ஏற்படாதது, பணவீக்கம் குறைவடைந்தது மற்றும் புலம்பெயர் தொழிலாளர்களின் பணவரவு அதிகரித்தது ஆகியவையே இந்த முன்னேற்றத்திற்குக் காரணம் என குறிப்பிடப்பட்டுள்ளது.

இயற்கை அனர்த்தங்கள் குறைந்த மற்றும் பொருளாதார ரீதியில் ஓரளவு ஸ்திரத்தன்மை நிலவிய ஒரு சாதகமான ஆண்டிலேயே, பங்களாதேஷ் உலக அளவில் மோசமான நாடுகளின் பட்டியலில் இடம்பிடித்திருப்பது கவலைக்குரிய விடயமாகப் பார்க்கப்படுகிறது.

பங்களாதேஷின் உணவுப் பாதுகாப்பின்மை என்பது வெறும் வெள்ளம், சூறாவளி அல்லது திடீர் விலை அதிகரிப்பு போன்ற தற்காலிக காரணிகளுடன் மாத்திரம் தொடர்புடையது அல்ல என்பதை இது காட்டுகிறது. மாறாக, அங்கு நிலவும் உணவுப் பிரச்சினை என்பது மிகவும் ஆழமான கட்டமைப்பு ரீதியான பிரச்சினையாக மாறியுள்ளதாக அந்த அறிக்கை சுட்டிக்காட்டியுள்ளது.

இயற்கை அனர்த்தங்கள் ஏற்படும் காலங்களில், ஏற்கனவே வறுமையில் உள்ள குடும்பங்கள் மிக வேகமாகப் பாதிக்கப்படுவதற்கான வாய்ப்புகள் அதிகம் உள்ளதாகவும் அந்த அறிக்கையில் எச்சரிக்கப்பட்டுள்ளது.