ஜெருசலேமில் அருட்சகோதரி மீதான தாக்குதல்: பிரான்ஸ் கடும் கண்டனம்!

புனித பூமியில் (Holy Land) அதிகரித்து வரும் கிறிஸ்தவ விரோதச் செயல்களை எந்த வகையிலும் பொறுத்துக்கொள்ள முடியாது என பிரான்ஸ் வெளிவிவகார அமைச்சர் ஜீன்-நோயல் பரோட் (Jean-Noel Barrot) தெரிவித்துள்ளார்.

மேற்கு ஜெருசலேமில் பிரான்ஸ் நாட்டைச் சேர்ந்த கத்தோலிக்க அருட்சகோதரி ஒருவர் மீது நடத்தப்பட்ட கொடூரத் தாக்குதலையும் அவர் வன்மையாகக் கண்டித்துள்ளார்.

ஜெருசலேமில் அருட்சகோதரி ஒருவர் நடந்து செல்லும்போது, அவரைப் பின்தொடர்ந்த நபர் ஒருவர் திடீரென அவரை கீழே தள்ளியுள்ளார். இதனால் அவரது தலையில் காயம் ஏற்பட்டது. அவர் கீழே விழுந்த பின்னரும் அந்த நபர் அவரைத் தாக்கியுள்ளார்.

இந்தச் சம்பவத்தின் காணொளியை இஸ்ரேலிய காவல்துறை வியாழக்கிழமை வெளியிட்டது. அதனைத் தொடர்ந்து, தாக்குதலில் ஈடுபட்ட நபர் உடனடியாகக் கைது செய்யப்பட்டுள்ளார்.

இந்தக் கொடூரச் செயலில் ஈடுபட்ட நபருக்கு முன்மாதிரியான தண்டனை வழங்கப்பட வேண்டும் என பிரான்ஸ் வெளிவிவகார அமைச்சர் வலியுறுத்தியுள்ளார்.