மக்களுக்கு வரிச்சுமை,புகையிலை நிறுவனங்களுக்கு வரிச்சலுகை - அரசாங்கம் மீது சஜித் குற்றச்சாட்டு

பொது மக்கள் மீதான வரிச்சுமையை அதிகரித்துள்ள அரசாங்கம், புகையிலை நிறுவனங்களுக்கு வரிச்சலுகைகளை வழங்கியுள்ளதாக எதிர்க்கட்சித் தலைவர் சஜித் பிரேமதாஸ இன்று (10) நாடாளுமன்றத்தில் குற்றம் சாட்டியுள்ளார்.

நாடாளுமன்றத்தில் இன்று நடைபெற்ற பொருளாதார நிலைமை குறித்த விவாதத்தில் கலந்துகொண்டு உரையாற்றும் போதே அவர் இந்த குற்றச்சாட்டுகளை முன்வைத்துள்ளார்.

அரசாங்கத்தின் வருமான வளர்ச்சி என்பது, தனிநபர்கள் மற்றும் வணிகங்கள் மீது விதிக்கப்பட்ட வரிகள் மூலம் மட்டுமே கிடைத்துள்ளது என எதிர்க்கட்சித் தலைவர் சுட்டிக்காட்டினார்.

குறிப்பாக, பெறுமதி சேர்க்கப்பட்ட வரி (VAT) மற்றும் ஏனைய தீர்வைகள் அதிகரிக்கப்பட்டதன் மூலமே இந்த வருமானம் ஈட்டப்பட்டுள்ளதாக அவர் தெரிவித்தார்.

உலக சுகாதார நிறுவனம் (WHO) புகையிலை மீதான வரிகளை உயர்ந்த மட்டத்தில் பேணுமாறு பரிந்துரைத்துள்ள போதிலும், உள்நாட்டில் அத்தியாவசியப் பொருட்கள் மற்றும் சேவைகள் மீதான வரிகள் அதிகரிக்கப்பட்டு, சிகரெட் மீதான வரிகள் குறைக்கப்பட்டுள்ளதாக அவர் உரிமை கோரினார்.

சிகரெட் வரிகளைக் குறைத்ததன் காரணமாக, அரசாங்கத்திற்கு கிடைக்கவிருந்த சுமார் 17.3 பில்லியன் ரூபாய் வருமானம் இழக்கப்பட்டுள்ளதாக சஜித் பிரேமதாஸ மேலும் தெரிவித்தார்.

எனவே, அரசாங்கம் இந்த வரிவழங்கல் கொள்கையை மறுபரிசீலனை செய்ய வேண்டும் எனவும், இதன் மூலம் கிடைக்கப் பெறும் கூடுதல் வருமானத்தைப் பயன்படுத்தி பொது மக்களுக்கு நிவாரணங்களை வழங்கி, அத்தியாவசியப் பொருட்களின் விலைகளைக் குறைக்க நடவடிக்கை எடுக்க வேண்டும் எனவும் அவர் வலியுறுத்தினார்.

அத்துடன், தற்போதைய வரிவிதிப்புக் கொள்கையானது வணிகங்கள், வேலைவாய்ப்பு, ஓய்வூதியதாரர்கள் மற்றும் ஒட்டுமொத்தப் பொருளாதாரத்தில் ஏற்படுத்தியுள்ள தாக்கங்கள் குறித்தும் அவர் நாடாளுமன்றத்தில் தனது கவலையை வெளிப்படுத்தியுள்ளார்.