உலகளவில் முடங்கியது மெட்டா சேவை : பேஸ்புக், இன்ஸ்டாகிராம், த்ரெட்ஸ் செயலிகள் திடீர் செயலிழப்பு - பயனர்கள் பெரும் தவிப்பு!

மெட்டா (Meta) நிறுவனத்திற்குச் சொந்தமான உலகின் முன்னணி சமூக வலைத்தளங்களான பேஸ்புக் (Facebook), மெசஞ்சர் (Messenger), இன்ஸ்டாகிராம் (Instagram) மற்றும் த்ரெட்ஸ் (Threads) ஆகிய சேவைகள் இன்று (12) திடீரென உலகளவில் கடுமையான தொழில்நுட்பக் கோளாறுகளை எதிர்கொண்டுள்ளதாக சர்வதேச ஊடகங்கள் செய்தி வெளியிட்டுள்ளன.

இன்று மதியம் முதல் இந்தச் சமூக வலைத்தளங்கள் வொன்றன்பின் ஒன்றாக வதிவிட மற்றும் மொபைல் செயலிகளில் முடங்கத் தொடங்கியுள்ளன. இதனால் உலகெங்கிலும் உள்ள மில்லியன் கணக்கான பயனர்கள் தங்களது கணக்குகளைப் பயன்படுத்த முடியாமலும், தகவல்களைப் பரிமாற முடியாமலும் பெரும் அசௌகரியத்திற்கு உள்ளாகியுள்ளனர்.

இணையதளங்களின் செயல்பாடுகளைக் கண்காணிக்கும் சர்வதேச தளங்கள் மற்றும் சமூக வலைத்தளங்களில் பயனர்கள் பதிவிட்டுள்ள முறைப்பாடுகளின் அடிப்படையில் பின்வரும் பிரதான சிக்கல்கள் கண்டறியப்பட்டுள்ளன:

பயனர்களின் கணக்குகள் தானாகவே லாக்-அவுட் செய்யப்பட்டுள்ளதுடன், மீண்டும் உள்நுழைய முற்படும்போது பிழைச் செய்திகள் (Errors) காண்பிக்கப்படுகின்றன.

இன்ஸ்டாகிராம் மற்றும் பேஸ்புக் பக்கங்களில் புதிய பதிவுகள் லோட் ஆகாமல், மிக மந்தமான நிலையிலேயே காணப்படுகின்றன.

மெசஞ்சர் செயலி மூலம் குறுஞ்செய்திகளை அனுப்பவோ அல்லது பெறவோ முடியாத நிலை ஏற்பட்டுள்ளது.

இந்தத் தொழில்நுட்பக் கோளாறானது உலகெங்கிலும் உள்ள அனைத்துப் பயனர்களுக்கும் ஒரே மாதிரியாகப் பாதிக்கவில்லை என்பது குறிப்பிடத்தக்கது.

சில குறிப்பிட்ட பிராந்தியங்களில் உள்ள பயனர்கள் மிகக் கடுமையான முடக்கத்தை எதிர்கொண்டுள்ள அதேவேளையில், இன்னும் சில பகுதிகளில் உள்ள பயனர்களுக்குச் சேவைகள் வழக்கம் போல் சாதாரணமாக இயங்கி வருவதாகவும் தெரிவிக்கப்படுகிறது.

இந்த திடீர் சேவை முடக்கத்திற்கான துல்லியமான காரணம் என்ன என்பது குறித்து மெட்டா நிறுவனம் இதுவரை அதிகாரப்பூர்வமாக எந்தவொரு அறிவிப்பையும் வெளியிடவில்லை.

இருப்பினும், மெட்டா நிறுவனம் சமீபத்தில் மேற்கொண்ட சர்வர் மேம்படுத்தல்கள் (Server Updates) அல்லது பிரதான சர்வர்களில் ஏற்பட்ட ஏதேனும் தொழில்நுட்பக் கோளாறுகள் காரணமாகவே இந்த நிலை ஏற்பட்டிருக்கலாம் எனத் தொழில்நுட்ப வல்லுநர்கள் கணித்துள்ளனர்.

பொதுவாக இதுபோன்ற பெரிய சமூக வலைத்தள முடக்கங்கள் குறுகிய காலத்திற்கே நீடிக்கும் என்பதால், தற்போதைய தொழில்நுட்பக் கோளாறுகளைக் கண்டறிந்து, சேவைகளை மிக விரைவாக இயல்பு நிலைக்குக் கொண்டுவருவதற்காக மெட்டா நிறுவனத்தின் பொறியியலாளர் குழுக்கள் (Engineers Team) தீவிரமாகப் பணியாற்றி வருவதாக சர்வதேச ஊடகங்கள் மேலும் தெரிவித்துள்ளன.