2.5 மில்லியன் டொலர் கொள்ளை: பொறுப்பில் இருந்து நழுவுகிறதா மத்திய வங்கி? நாடாளுமன்றத்தில் ரவூப் ஹக்கீம் கேள்வி!

பெரும் சர்ச்சை ஏற்படுத்திய 2.5 மில்லியன் டொலர் மத்திய திறைசேரி பணக் கொள்ளைக்கான பொறுப்பை மத்திய வங்கி ஏற்க வேண்டியதில்லை என மத்திய வங்கியின் ஆளுநர் தெரிவித்துள்ளார்.

மத்திய வங்கியின் ஆளுநர் நந்தலால் வீரசிங்க நிதிக்குழு முன்னிலையில் வெளியிட்ட இந்த அறிக்கை தொடர்பில், இன்று (25) நாடாளுமன்றத்தில் ஐக்கிய மக்கள் சக்தியின் நாடாளுமன்ற உறுப்பினர் ரவூப் ஹக்கீம் கருத்து வெளியிட்டிருந்தார்.

நாடாளுமன்றத்தில் இன்று உரையாற்றிய போதே அவர் இதனை தெரிவித்துள்ளார்.

"வெளிநாட்டு கடன்களை செலுத்தும் போது, அது தவறான கணக்கொன்றிற்கு சென்றமை தொடர்பில் விசாரணை நடத்தப்படும் போது, இந்த விவகாரத்திற்கு நாங்கள் பொறுப்பல்ல என்று மத்திய வங்கியின் ஆளுநர் நிதிக்குழுவில் கூறுகின்றார். நிதி பரிமாற்ற ஒழுங்குமுறை சட்டத்திற்கு பொறுப்புக்கூற வேண்டிய அவசியமில்லை என்றும் அவர் கூறினார்.

அதனை சட்டமா அதிபர் திணைக்களமும் அங்கீகரித்துள்ளது. பணத்தை அனுப்பும் போது, அந்த சட்டத்தின் பிரிவின் கீழ் அனைத்து நிறுவனங்களும் பொறுப்புக்கூற வேண்டும் என்று நான் கூறினேன். நிதி பரிமாற்ற சட்டம் மிகவும் தெளிவாக உள்ளது" என அவர் தெரிவித்தார்.