அப்பிள் அப் ஸ்டோரில் இருந்து டெலிகிராம் திடீர் மாயம் – காரணம் என்ன?

உலகம் முழுவதும் அப்பிளின் அப் ஸ்டோரில் இருந்து டெலிகிராம் செயலி தற்காலிகமாக மறைந்துள்ளது. இதனால், ஐபோன் மற்றும் ஐபாட் பயனர்கள் டெலிகிராமை தேடவோ, புதிதாக பதிவிறக்கம் செய்யவோ முடியாத நிலை ஏற்பட்டுள்ளது.

டெலிகிராமின் அப் ஸ்டோர் பக்கத்தில் தற்போது "Page Not Found" என்ற பிழைச் செய்தி காணப்படுகிறது. இந்த விவகாரம் தொடர்பாக இதுவரை அப்பிள் அல்லது டெலிகிராம் நிறுவனங்கள் அதிகாரப்பூர்வ விளக்கமொன்றையும் வெளியிடவில்லை.

டெலிகிராம் நிறுவனத்தின் தலைமை நிர்வாக அதிகாரி பாவெல் துரோவ்வும் இதுகுறித்து கருத்து தெரிவிக்கவில்லை.

இந்த நீக்கம் தொழில்நுட்பக் கோளாறா அல்லது கொள்கை மீறல் தொடர்பான நடவடிக்கையா என்பது இதுவரை உறுதிப்படுத்தப்படவில்லை.

ஏற்கனவே டெலிகிராம் செயலியை நிறுவியுள்ள பயனர்கள் தொடர்ந்து பயன்படுத்த முடியும். ஆனால், செயலியை அன்-இன்ஸ்டால் செய்ய வேண்டாம் என தொழில்நுட்ப தரப்புகள் அறிவுறுத்துகின்றன.

ஏனெனில், தற்போதைக்கு அதை அப் ஸ்டோரில் இருந்து மீண்டும் பதிவிறக்கம் செய்ய முடியாத நிலை உள்ளது.

புதிய ஐபோன் அல்லது ஐபாட் சாதனங்களை அமைக்கும் பயனர்களும் டெலிகிராமை நிறுவ முடியாது. மேலும், இந்த பிரச்சினை தீர்க்கப்படும் வரை iOS பதிப்பிற்கான அப்டேட்கள், பிழை திருத்தங்கள் மற்றும் பாதுகாப்பு மேம்பாடுகளும் தற்காலிகமாகக் கிடைக்காது.

இருப்பினும், டெலிகிராமின் இணையப் பதிப்பு, விண்டோஸ், மேக்ஓஎஸ் (macOS) மற்றும் ஆண்ட்ரொய்ட் செயலிகள் வழக்கம்போல செயல்பட்டு வருகின்றன.

இது டெலிகிராம் அப் ஸ்டோரில் இருந்து நீக்கப்படுவது முதல் முறை அல்ல. 2018ஆம் ஆண்டு, சட்டவிரோத மற்றும் பொருத்தமற்ற உள்ளடக்கங்கள் தொடர்பான கவலைகள் காரணமாக, டெலிகிராம் மற்றும் Telegram X செயலிகளை அப்பிள் தற்காலிகமாக நீக்கியிருந்தது. பின்னர், உள்ளடக்கக் கண்காணிப்பு அமைப்புகளை மேம்படுத்தியதைத் தொடர்ந்து அவை மீண்டும் அப் ஸ்டோரில் சேர்க்கப்பட்டன.

1 பில்லியனுக்கும் அதிகமான செயலில் உள்ள பயனர்களைக் கொண்ட டெலிகிராம், உலகின் மிகவும் பிரபலமான குறுந்தகவல் செயலிகளில் ஒன்றாகும். தற்போதைய அப் ஸ்டோர் நீக்கம் குறித்து சமூக ஊடகங்களில் பயனர்கள் பரவலாக விவாதித்து வருகின்றனர்.