கால்வாயிலிருந்து இரண்டு வயதுக் குழந்தை உடலமாக மீட்பு

அநுராதபுரம், கல்னேவ - கலேவெவ வீதிப் பகுதியில் உள்ள கால்வாயில் விழுந்து இரண்டு வயதுக் குழந்தை உயிரிழந்துள்ளதாகக் காவல்துறையினர் தெரிவித்துள்ளனர்.

குழந்தையைக் காணவில்லை என அதன் தந்தை நேற்று (23) கல்னேவ காவல்துறையில் அளித்த முறைப்பாட்டின் அடிப்படையில், அந்தப் பகுதி மக்களுடன் இணைந்து காவல்துறையினர் தேடுதல் நடவடிக்கையை மேற்கொண்டனர்.

இதன்போது, வீட்டின் அருகில் கால்வாயொன்றின் பாலத்தின் அடியில் குழந்தை சிக்குண்ட நிலையில் கண்டெடுக்கப்பட்டது.

பின்னர் உடனடியாகக் கல்னேவ மருத்துவமனையில் குழந்தை அனுமதிக்கப்பட்டபோதிலும், அது ஏற்கனவே உயிரிழந்துவிட்டதாக மருத்துவர்கள் உறுதிப்படுத்தியுள்ளனர்.

உயிரிழந்த குழந்தை கல்னேவ பகுதியைச் சேர்ந்தவர் என்பதுடன், உடற்கூறாய்வு பரிசோதனைகளுக்காக உடலம் மருத்துவமனையின் பிரேத அறையில் வைக்கப்பட்டுள்ளது.

இந்தச் சம்பவம் குறித்து கல்னேவ காவல்துறையினர் மேலதிக விசாரணைகளை முன்னெடுத்து வருகின்றனர்.