வாகன இறக்குமதி மூலம் சுங்கத்திணைக்களத்தின் வருமானம் அதிகரிப்பு

நடப்பு ஆண்டின் முதல் ஆறு மாதங்களில் இலங்கைக்கு 316,000 வாகனங்கள் இறக்குமதி செய்யப்பட்டுள்ளதாக இலங்கை சுங்கம் அறிவித்துள்ளது.

இந்த வாகன இறக்குமதி மூலம் 512.547 பில்லியன் ரூபாய் வரி வருமானம் ஈட்டப்பட்டுள்ளதாக தெரிவிக்கப்பட்டுள்ளது.

நாடாளுமன்றத்தின் வழிகள் மற்றும் வழிவகைகள் குழுவின் (Committee on Ways and Means) சுங்கச் செயற்பாடுகள் மற்றும் வருமான செயற்திறன் குறித்த மீளாய்வுக் கூட்டத்திலேயே இந்தத் தரவுகள் வெளியிடப்பட்டன.

வாகனம் தொடர்பான வரி வருமானத்தில் சிற்றூந்துகளின் இறக்குமதி மிகப்பெரிய பங்கை வகித்துள்ளதுடன், இதன் மூலம் 386.726 பில்லியன் ரூபாய் வருமானமாக பெறப்பட்டுள்ளது.

வாகனப் பிரிவுகளில் 1,000cc க்கும் குறைவான இயந்திரத் திறன் கொண்ட பெற்றோல் சிற்றூந்துகள் அதிக வருமானத்தை ஈட்டித் தந்துள்ளன; இது 137.4 பில்லியன் ரூபாயாகும் எனத் தெரிவிக்கப்பட்டுள்ளது.

ஜூன் 30 ஆம் திகதி நிலவரப்படி இலங்கை சுங்கம் மொத்தம் 1.379 ட்ரில்லியன் ரூபாய் வருமானத்தைப் பதிவு செய்துள்ளது. இது இந்தக் காலப்பகுதிக்காக நிர்ணயிக்கப்பட்ட 1.061 ட்ரில்லியன் ரூபாய் என்ற இலக்கை விட அதிகமாகும்.