மாணவர்களுக்கு நவீன தொழில்நுட்பக் கல்வி – நாடளாவிய ரீதியில் 4,570 ஸ்மார்ட் பலகைகள்!

நாடாளுமன்ற உறுப்பினர் ரோஹிணி குமாரி விஜேரத்ன இன்று (22) நாடாளுமன்றத்தில் எழுப்பிய கேள்விக்கு பதிலளிக்கும்போதே பிரதமர் இதனைத் தெரிவித்தார்.

இதன்படி, 2024ஆம் ஆண்டு இலங்கை தொலைத்தொடர்பு ஒழுங்குபடுத்தல் ஆணைக்குழுவின் நிதி ஒதுக்கீட்டின் கீழ் பெறப்பட்ட 1,000 ஸ்மார்ட் பலகைகள், 1,000 பாடசாலைகளுக்கு ஏற்கனவே விநியோகிக்கப்பட்டுள்ளன.

அத்துடன், 2025–2026ஆம் ஆண்டுகளுக்கான சீன உதவித் திட்டத்தின் கீழ் இறக்குமதி செய்யப்பட்ட 900 ஸ்மார்ட் பலகைகளில், 500 பலகைகள் இதுவரை பாடசாலைகளுக்கு வழங்கப்பட்டுள்ளதுடன், அவற்றை நிறுவும் பணிகளும் இடம்பெற்று வருகின்றன.

மேலும், டிஜிட்டல் பணிக்குழுவின் வழிகாட்டுதலின் கீழ், டிஜிட்டல் பொருளாதார அமைச்சின் நிதி ஒதுக்கீட்டில் மாகாண மட்டத்தில் கொள்வனவு செய்யப்பட்ட 2,670 ஸ்மார்ட் பலகைகளையும் முழுமையாக விநியோகிக்க நடவடிக்கை எடுக்கப்பட்டுள்ளதாக பிரதமர் தெரிவித்தார்.

இந்தப் பலகைகளை பாடசாலைகளில் நிறுவும் பணிகளும் தற்போது இடம்பெற்று வருவதாக அவர் குறிப்பிட்டார்.

மாகாண மட்டத்தில் அதிகளவான ஸ்மார்ட் பலகைகள் வடமேல் மாகாணத்திற்கு வழங்கப்பட்டுள்ளதுடன், அதன் எண்ணிக்கை 524 ஆகும்.

மேல் மாகாணத்திற்கு 481, கிழக்கு மாகாணத்திற்கு 371, ஊவா மாகாணத்திற்கு 363, தென் மாகாணத்திற்கு 311, வடமத்திய மாகாணத்திற்கு 200, மத்திய மாகாணத்திற்கு 170, சப்ரகமுவ மாகாணத்திற்கு 150 மற்றும் வட மாகாணத்திற்கு 100 ஸ்மார்ட் பலகைகள் வழங்கப்பட்டுள்ளன.

பாடசாலை வகுப்பறைகளை டிஜிட்டல் மயப்படுத்தி, நவீன தொழில்நுட்பத்தை மாணவர்களுக்கு நெருக்கமாகக் கொண்டு வருவதே இந்தத் திட்டங்களின் பிரதான நோக்கம் என பிரதமர் ஹரிணி அமரசூரிய மேலும் தெரிவித்தார்.