வெலிகம அஞ்சல் நிலையத்தில் ரூ. 21 இலட்சம் மாயம்? – அஞ்சல் திணைக்களம் விசாரணை

வெலிகம பிரதான அஞ்சல் நிலையத்தின் கீழ் 17 உப அஞ்சல் நிலையங்கள் இயங்கி வருவதுடன், கடிதப் பரிமாற்றம், பொருட்களை அனுப்புதல், வாகன அபராதம் செலுத்துதல், முதியோர் கொடுப்பனவு மற்றும் பணப் பரிமாற்றம் உள்ளிட்ட பல்வேறு சேவைகள் வழங்கப்பட்டு வருகின்றன.

இந்த அஞ்சல் நிலைய வலையமைப்பின் ஊடாக தினசரி வருமானமாக 30 முதல் 40 இலட்சம் ரூபாய்க்கும் அதிகமான தொகை கிடைப்பதாகவும் தெரிவிக்கப்படுகிறது.

அஞ்சல் நிலையத்தின் வருமானம் மற்றும் செலவுகள் தினசரி முறையாகப் பதிவு செய்யப்பட வேண்டும் என்பதுடன், பிரதான அஞ்சல் நிலையத்தில் அதிகபட்சமாக 2 இலட்சத்து 50 ஆயிரம் ரூபாய் மாத்திரமே கையிருப்பாக வைத்திருக்க முடியும் எனவும் கூறப்படுகிறது.

இதற்கு மேலதிகமாகக் கிடைக்கும் பணம் தினசரி வங்கியில் வைப்பிலிடப்பட வேண்டிய நிலையில், அவ்வாறு வைப்பிலிடப்பட வேண்டிய பணம் முறையாகக் கையாளப்படவில்லை எனத் தெரிவிக்கப்படுகிறது.

இந்த நிலையில், வருடாந்த கணக்காய்வின்போது 21 இலட்சம் ரூபாய் தொடர்பில் ஏற்பட்ட கணக்கு முரண்பாடு குறித்து தற்போது விசாரணைகள் முன்னெடுக்கப்பட்டுள்ளதாக அஞ்சல் திணைக்களத் தகவல்கள் தெரிவிக்கின்றன.

குறித்த விடயம் தொடர்பாக வெலிகம பிரதான அஞ்சல் நிலையத்தின் தற்போதைய அஞ்சல் நிலைய அதிபரிடம் தொலைபேசி ஊடாக வினவியபோது, உரிய அனுமதியின்றி இது தொடர்பான தகவல்களை வழங்க முடியாது என அவர் தெரிவித்துள்ளார்.