சமரியின் அதிரடி சதத்தால் இலங்கை அணிக்கு வெற்றி!

ஐசிசி மகளிர் இருபதுக்கு 20 உலகக் கிண்ணத் தொடரில் அயர்லாந்து மகளிர் அணிக்கு எதிரான போட்டியில் இலங்கை மகளிர் அணி 9 விக்கெட்டுகளால் வெற்றி பெற்றுள்ளது.

இந்த போட்டியில் முதலில் துடுப்பெடுத்தாடிய அயர்லாந்து அணி, நிர்ணயிக்கப்பட்ட 20 ஓவர்கள் நிறைவில் 5 விக்கெட்டுகளை இழந்து 130 ஓட்டங்களைப் பெற்றுக்கொண்டது.

பதிலுக்கு 131 ஓட்டங்கள் என்ற வெற்றி இலக்கை நோக்கித் துடுப்பெடுத்தாடிய இலங்கை மகளிர் அணி, 15.3 ஓவர்களில் 1 விக்கெட்டை மாத்திரம் இழந்து 134 ஓட்டங்களைப் பெற்று வெற்றியைத் தன்வசப்படுத்தியது.

ஆரம்பம் முதலே அதிரடியாக விளையாடிய இலங்கை அணியின் தலைவி சமரி அத்தபத்து, 61 பந்துகளில் 17 பவுண்டரிகள் மற்றும் 2 சிக்ஸர்கள் அடங்கலாக ஆட்டமிழக்காமல் 106 ஓட்டங்களைக் குவித்து அணியின் வெற்றியை உறுதி செய்தார்.