නව ජනතා පෙරමුණ නායක සුගීෂ්වරගෙන් සහ මුදල් අමාත්‍යාංශ ලේකම්ගෙන් පොලිසියට පැමිණිලි

නව ජනතා පෙරමුණේ නායක සුගීෂ්වර බණ්ඩාර ඇතුළු පිරිසක් අද (29) පෙරවරුවේ තලංගම පොලිසියට පැමිණ පැමිණිල්ලක් ඉදිරිපත් කළා.

ඒ මුදල් අමාත්‍යංශ ලේකම්වරයාට එම ධුරයෙන් ඉවත් වන ලෙස කළ විරෝධතාවට පහර දුන් පිරිසට එරෙහිව නීතිය ක්‍රියාත්මක කරන ලෙස ඉල්ලමින්.

මේ අතර තලංගම පොලිස් ස්ථානාධිපතිවරයා සඳහන් කළේ, මුදල් අමාත්‍යංශ ලේකම් ආචාර්ය හර්ෂණ සූරියප්පෙරුම ද එම සිදුවීම සම්බන්ධයෙන් ඊයේ (28) පස්වරුවේ පොලිසියට පැමිණිල්ලක් ඉදිරිපත් කර ඇති බවයි.

මහා භාණ්ඩාගාරය සතු අමෙරිකානු ඩොලර් මිලියන 2.5ක මුදලක් වෙනත් පාර්ශ්වයක් අතට පත්වීමේ සිද්ධියට අදාළව හර්ෂණ සූරියප්පෙරුම මුදල් අමාත්‍යාංශ ලේකම් ධුරයෙන් ඉවත් විය යුතු බව පවසමින් නව ජනතා පෙරමුණේ නියෝජිතයින් පිරිසක් ඊයේ විරෝධතාවක නිරත වුණා.

ඒ බත්තරමුල්ල - පැලවත්ත ප්‍රදේශයේ පිහිටි මුදල් අමාත්‍යාංශයේ ලේකම්වරයාගේ නිවස ඉදිරිපිටදියි.

විරෝධතාව අතරතුර තවත් පිරිසක් පැමිණ උද්ඝෝෂණයේ නිරත නව ජනතා පෙරමුණේ පිරිසට විරෝධය පළ කළ අතර, එහිදී ඔවුන්ට ගොම ප්‍රහාරයක්ද එල්ල වුණා.