හැටන් - ඩයගම බස් රථ අනතුරින් 34ක් රෝහලේ - Hiru News - Srilanka's Number One News Portal, Most visited website in Sri Lanka

%E0%B7%84%E0%B7%90%E0%B6%A7%E0%B6%B1%E0%B7%8A+-+%E0%B6%A9%E0%B6%BA%E0%B6%9C%E0%B6%B8+%E0%B6%B6%E0%B7%83%E0%B7%8A+%E0%B6%BB%E0%B6%AE+%E0%B6%85%E0%B6%B1%E0%B6%AD%E0%B7%94%E0%B6%BB%E0%B7%92%E0%B6%B1%E0%B7%8A+34%E0%B6%9A%E0%B7%8A+%E0%B6%BB%E0%B7%9D%E0%B7%84%E0%B6%BD%E0%B7%9A

හැටන් පොලිස් වසමට අයත් ඩයගම - හැටන් බෝඩේස් මාර්ගයේ බඩල්ගල ප්‍රදේශයේදී මගී බස් රථයක් අඩි 35ක පමණ ප්‍රපාතයකට පෙරළී අදද (29) සවස සිදුවූ අනතුරින් පුද්ගලයන් 34 දෙනෙකු මේ වන විට රෝහල්ගත කර ඇතැයි පොලිස් මූලස්ථානය පවසනවා.

මෙම අනතුරින් එක් අයකු රෝහල් ගත කිරීමෙන් අනතුරුව මියගොස් තිබුණා.

ඩයගම සිට හැටන් දෙසට ධාවනය වූ මෙම පෞද්ගලික බස් රථය, ඩල්ගල ප්‍රදේශයේදී ප්‍රතිවිරුද්ධ දිශාවෙන් පැමිණි වෙනත් වාහනයකට ඉඩ ලබා දීමට උත්සාහ දරා තිබූ බවයි පොලිසිය පවසන්නේ.

එහිදී බස් රථය මාර්ගයෙන් ඉවතට පැන අඩි 35ක් පමණ ගැඹුරු ප්‍රපාතයකට පෙරළී මෙම අනතුර සිදුව ඇති බව පොලිසිය සඳහන් කරනවා.

අනතුර සිදුවන අවස්ථාවේ බස් රථය තුළ මගීන් 40 දෙනෙකු පමණ සිට ඇති අතර, ඉන් රියදුරු ඇතුළු 34 දෙනෙකු තුවාල ලබා දික්ඔය රෝහලට ඇතුළත් කෙරුණා.

රෝහලේදී ප්‍රතිකාර ලබමින් සිටියදී හැටන් ප්‍රදේශයේ පදිංචි 70 හැවිරිදි පිරිමි පුද්ගලයෙකු ජීවිතක්ෂයට පත්ව තිබුණා.

තුවාල ලබා රෝහල් ගත කළ පිරිස අතර පිරිමි පුද්ගලයන් 17 දෙනෙක්, කාන්තාවන් 14 දෙනෙක් සහ වයස අවුරුදු 12ක පිරිමි දරුවෙකු සහ අවුරුදු 04ක ගැහැණු දරුවෙක් සිටින බවයි පොලිසිය පවසන්නේ.

තුවාල ලැබූවන් අතරින් එක් පුද්ගලයෙකුගේ තත්ත්වය බරපතළ බැවින් ඔහු වැඩිදුර ප්‍රතිකාර සඳහා මහනුවර ශික්ෂණ රෝහල වෙත මාරු කර යවා ඇත.

අනතුර සම්බන්ධයෙන් හැටන් පොලිසිය විසින් වැඩිදුර විමර්ශන කටයුතු ආරම්භ කර තිබෙනවා.