රන් ණය සහ උකස් පහසුකම් සඳහා මහ බැංකුවෙන් 70%ක උපරිම සීමාවක්

මූල්‍ය පද්ධතියේ ස්ථාවරභාවය තහවුරු කිරීම සහ අවදානම් අවම කිරීම අරමුණු කරගනිමින්, රන් භාණ්ඩ ඇපයට තබා ලබාදෙන ණය පහසුකම් සඳහා වන උපරිම ‘ණය-වටිනාකම් අනුපාතය’ (Maximum Loan-to-Value / LTV Ratio) සීමා කිරීමට ශ්‍රී ලංකා මහ බැංකුව පියවර ගෙන තිබෙනවා.

ඒ අනුව, මහ බැංකු අධිපති ආචාර්ය පී. නන්දලාල් වීරසිංහගේ අත්සනින් යුතුව නිකුත් කර ඇති 2026 අංක 02 දරන මෙම නව මහ බැංකු නියෝග මාලාව 2026 මැයි මස 25 වැනිදා සිට ක්‍රියාත්මක වන පරිදි බලපැවැත්වෙනු ඇති.

මෙම නව නියෝගයන්ට අදාළව,

1. පනවා ඇති උපරිම ණය සීමාව:
2026 මැයි 25 වැනිදා සිට ක්‍රියාත්මක වන පරිදි සියලුම බලපත්‍රලාභී වාණිජ බැංකු, විශේෂිත බැංකු සහ බලපත්‍රලාභී මුදල් සමාගම් (LFCs) මඟින් රන් භාණ්ඩ ඇපයට තබා ලබාදෙන ණය පහසුකම්, එම රන් භාණ්ඩවල වටිනාකමෙන් 70% ක උපරිම සීමාවකට යටත් විය යුතුය.

මෙම සීමාව නව ණය පහසුකම් සඳහා මෙන්ම, පවතින ණයක් නැවත අලුත් කිරීමේදී ද (Renewals) එකසේ අදාළ වේ.

2. අදාළ වන ණය වර්ග:
මෙම නියෝගය සාමාන්‍ය උකස් පහසුකම් (Pawning Facilities), රන් ණය (Gold Loans) සහ රන් භාණ්ඩ ඇපයට තබා ගනිමින් ලබාදෙන වෙනත් ඕනෑම ආකාරයක ණය හෝ මූල්‍ය පහසුකම් සඳහා වලංගු වේ.

3. රන් භාණ්ඩවල වටිනාකම තීරණය කිරීම:
ණය පහසුකම් ලබාදීමේදී ඇපයට ගන්නා රන් භාණ්ඩවල වටිනාකම ලෙස එහි ‘වෙළඳපොළ වටිනාකම’ (Market Value) සැලකිය යුතුය. ඒ සඳහා බැංකු සහ මූල්‍ය සමාගම් දැනට භාවිත කරනු ලබන විචක්ෂණශීලී තක්සේරුකරණ ක්‍රමවේදයන් (Prudential Practices) තවදුරටත් අනුගමනය කළ හැක.

කෙසේ වෙතත්, ණය ලබාදෙන අවස්ථාවේදී සිදුකරන මෙම තක්සේරු කිරීම් මඟින් අදාළ රන් භාණ්ඩ සඳහා නිවැරදි සහ සාධාරණ වටිනාකමක් (True and Fair Value) ලැබෙන බවට එම ආයතන වගබලා ගත යුතුය.

සවිස්තරාත්මක නිවේදනය මෙතැනින් බලන්න (Click)