අමෙරිකාවේ නව බදුවලින් ඇඟලුම් ක්ෂේත්‍රයට බලපෑම්

අමෙරිකාව විසින් ශ්‍රී ලංකාවට පනවා ඇති සියයට 10ක තීරුබද්ද හේතුවෙන් වැඩි බලපෑමක් එල්ල විය හැක්කේ ඇඟලුම් ක්ෂේත්‍රයට බව නිදහස් වෙළෙඳ කලාප ආයෝජකයන්ගේ සංගමය පවසනවා.

හිරු ප්‍රවෘත්ති අංශය කළ විමසීමකදී එහි සභාපති ධම්මික ප්‍රනාන්දු කියා සිටියේ, ඒ අනුව, අමෙරිකාවට අපනයනය කෙරෙන ඇඟලුම් සඳහා සියයට 18 සිට 42 දක්වා තීරු බදු ගෙවීමට මෙරට අපනයනකරුවන්ට සිදුවනු ඇති බවයි.

අමෙරිකාව විසින් මෙලෙස ශ්‍රී ලංකාව ඇතුළු රටවල් 60කට නව තීරු බදු පැනවීමක් සිදුකරනු ලැබුවේ බලහත්කාර ශ්‍රමය භාවිතයෙන් නිපදවන භාණ්ඩ ආනයනය වැළැක්වීමට අපොහොසත් වී ඇති බව පවසමින්.

ඒ අනුව, අමෙරිකානු ජනාධිපති ඩොනල්ඩ් ට්‍රම්ප්ගේ පරිපාලනය විසින් නිවේදනය කරන ලද නව වෙළෙඳ පියවරයන් යටතේ, අමෙරිකා එක්සත් ජනපදයට ඇතුළු වන ශ්‍රී ලංකා භාණ්ඩ සඳහා අද සිට සියයට 10ක තීරු බද්දක් අදාළ වන බවයි අමෙරිකානු වෙළෙඳ නියෝජිත කාර්යාලය නිවේදනයක් නිකුත් කරමින් සඳහන් කළේ.

කෙසේ වෙතත්, ශ්‍රී ලංකා අපනයන සඳහා සියයට 12.5ක බද්දක් එල්ල විය හැකි බවට ලැබුණු අනතුරු ඇඟවීම්වලින් අනතුරුව, ජනාධිපති අනුර කුමාර දිසානායක විසින් පසුගිය 10 වැනිදා ගැසට් නිවේදනයක් නිකුත් කරමින් බලහත්කාර ශ්‍රමය භාවිතයෙන් සම්පූර්ණයෙන්ම හෝ අර්ධ වශයෙන් නිෂ්පාදනය කරන ලද භාණ්ඩ ආනයනය කිරීම වහාම ක්‍රියාත්මක වන පරිදි තහනම් කිරීමටද පියවර ගත්තා.

එම නව රෙගුලාසියට අනුව, ආනයනකරුවන් තමන් ගෙන්වන භාණ්ඩ මෙම තහනමට අනුකූල වන බවට සහතික කළ ලේඛන ශ්‍රී ලංකා රේගුව වෙත ඉදිරිපත් කළ යුතුයි.

අමෙරිකානු වෙළෙඳ නියෝජිත කාර්යාලයට අනුව, බලහත්කාර ශ්‍රමය හා සබැඳි ආනයන තහනම් කිරීමට පියවර ගැනීම, ඒවා අර්ධ වශයෙන් ක්‍රියාත්මක කිරීම හෝ බලාත්මක කිරීමට එකඟතාව පළ කිරීම හේතුවෙන් ශ්‍රී ලංකාව මෙම අවම බදු ප්‍රතිශතය සඳහා සුදුසුකම් ලබා තිබෙනවා.

අමෙරිකානු වෙළෙඳ නියෝජිත ජේමිසන් ග්‍රියර් පැවසුවේ සියයට 10 සිට සියයට 12.5 දක්වා වන මෙම බදු පැනවීම මගින් වෙළෙඳ හවුල්කාර රටවල් අතර සිදුවන බලහත්කාර ශ්‍රම උල්ලංඝනය කිරීම්වලට විසඳුම් සෙවීමට අපේක්ෂා කරන බවයි.

මෙම සියයට 10 බදු කාණ්ඩයට ශ්‍රී ලංකාවට අමතරව ඉන්දියාව, බංග්ලාදේශය, පාකිස්ථානය, කැනඩාව, මෙක්සිකෝව, මැලේසියාව, ඉන්දුනිසියාව සහ එක්සත් රාජධානියද ඇතුළත්.

ඒ අනුව බ්‍රසීලය ඇතුළු බොහෝ රටවල් මෙම නිවේදනයට ප්‍රතිචාර දක්වා ඇති අතර බ්‍රසීල රජය පෙන්වා දෙන්නේ මෙම පියවර අයුක්ති සහගත මෙන්ම වංචාකාරී ක්‍රියාවක් ලෙසයි.

සියයට 12.5ක නව අමෙරිකානු තීරුබද්දකට ලක්ව ඇති බ්‍රසීලය, වෙනත් වෙළඳ හවුල්කරුවන් සලකා බලන බවත් වැඩිදුරටත් සඳහන් කර තිබෙනවා.

මෙම මස මුලදී අමෙරිකාව බ්‍රසීලයෙන් ආනයනය කරන ගෘහ භාණ්ඩ, යන්ත්‍රෝපකරණ, සීනි සහ අනෙකුත් ආනය භාණ්ඩ මත වෙනමම සියයට 25ක තීරුබද්දක්ද පනවා ඇති බවද වාර්තා වුණා.

එමෙන්ම ජපාන රජයද ප්‍රකාශ කර ඇත්තේ නව අමෙරිකානු තීරුබදු සම්බන්ධයෙන් තමන් කණගාටුවට පත්වන බවත්, තම වෙළෙඳාම ජාත්‍යන්තර නීතිවලට අනුකූලව සිදු කරන බවයි.

විදෙස් මාධ්‍ය වාර්තා කළේ ඔස්ට්‍රේලියානු වෙළෙඳ අමාත්‍ය ඩොන් ෆැරල් විසින් මෙම බදු පැනවීම අයුක්ති සහගත බවත්, තම රටේ භාණ්ඩ මත සියලුම බදු ඉවත් කරන ලෙසත් වොෂින්ටනයට තවදුරටත් බලපෑම් සිදු කරන බවට ප්‍රකාශ කළ බවයි.

එමෙන්ම චිලී රාජ්‍යයේ ජාත්‍යන්තර ආර්ථික සබඳතා පිළිබඳ උප ලේකම් පෝලා එස්ටේවෙස් ද ප්‍රකාශ කර ඇත්තේ, තම රටට ශක්තිමත් ශ්‍රම ආයතන, ප්‍රබල නියාමන රාමුවක් සහ බලහත්කාර ශ්‍රමය වැළැක්වීම සහ මුලින්ම ඉවත් කිරීම සඳහා ස්ථිර කැපවීමක් ඇති බවයි.

කෙසේ වෙතත් තීරුබදු මගින් අමෙරිකානු කම්කරුවන් ආරක්ෂා කරන අතර ඇමරිකානු ආර්ථිකය නංවාලන බවට අමෙරිකානු ජනපති ඩොනල්ඩ් ට්‍රම්ප් දිගු කලක් තිස්සේ තර්ක කළා.

මේ සම්බන්ධයෙන් ශ්‍රී ලංකාවේ අමෙරිකානු තානාපති මහින්ද සමරසිංහ ද සිය නිල Facebook ගිණුමේ සටහනක් තබමින් කියා සිටියේ, අමෙරිකාව සහ ශ්‍රී ලංකාව අතර ඇති ශක්තිමත් ද්විපාර්ශ්වික සබඳතා සහ ශ්‍රී ලංකා තානාපති කාර්යාලය විසින් ශ්‍රී ලංකාව සම්බන්ධයෙන් ගොඩනගා ඇති යහපත් ආකල්ප හේතුවෙන් ශ්‍රී ලංකාවට මෙම හිතකර ප්‍රතිඵලය ලැබී ඇති බවයි.

එමෙන්ම ඉල්ලීමක් කළහොත් ජනාධිපතිවරයා ඇතුළු රජයට ඔහුගේ සහාය ලබා දීමට සූදානම් බව ද එහි සඳහන්.