'සර්' එපා කී විසිවන සියවස උඩුයටිකුරු කළ බ්‍රිතාන්‍ය චිත්‍ර ශිල්පී ඩේවිඩ් හොක්නි අභාවප්‍රාප්ත වෙයි

විසිවන සියවසේ ගෝලීය කලා ක්ෂේත්‍රය තුළ විප්ලවීය වෙනසක් සිදු කරමින් ලොව පුරා අතිමහත් ප්‍රසිද්ධියට පත් වූ බ්‍රිතාන්‍ය ජාතික චිත්‍ර ශිල්පී ඩේවිඩ් හොක්නි (David Hockney) වයස අවුරුදු 88ක්ව තිබියදී අභාවප්‍රාප්ත වී තිබෙනවා.

පසුගිය ශතවර්ෂයේ හැටේ දශකයේ (1960s) ඇති වූ "පොප් කලා" (Pop Art) ව්‍යාපාරයේ ප්‍රමුඛයෙකු ලෙස කරළියට පැමිණි ඔහු, දශක හයකට අධික කාලයක් පුරා චිත්‍ර කලාව, ඡායාරූපකරණය සහ ඩිජිටල් කලාව යන ක්ෂේත්‍රයන්හි නිරත වෙමින් ලෝක ප්‍රසිද්ධ නිර්මාණ රැසක් බිහිකළ විශිෂ්ටයෙක්.

ඇමරිකාවේ ලොස් ඇන්ජලීස් නුවර තේමාව කරගනිමින් ඔහු විසින් නිර්මාණය කරන ලද පිහිනුම් තටාක සහිත සිතුවම් (Swimming Pool Paintings) ඔහුගේ කලා දිවියේ සුවිශේෂී සන්ධිස්ථානයක් ලෙස සැලකෙනවා.

1937 වසරේදී බ්‍රැඩ්ෆර්ඩ්හි උපත ලැබූ හොක්නි, කුඩා කල සිටම චිත්‍ර කලාවට සහජ දක්ෂතාවයක් දැක්වූවෙක්.

ලන්ඩනයේ රාජකීය කලා විද්‍යාලයෙන් (Royal College of Art) අධ්‍යාපනය හැදෑරූ ඔහු, එහි පවතින සම්ප්‍රදායික නීතිරීතිවලට එරෙහිව යමින් සිය කැරලිකාරී සහ නිදහස් කලා ශෛලිය මුළු ලොවටම ප්‍රදර්ශනය කළා.

එකල බ්‍රිතාන්‍ය සමාජය තුළ සමලිංගිකත්වය නීතිවිරෝධී වරදක්ව පැවති වටපිටාවක, ඩේවිඩ් හොක්නි කිසිදු බියකින් තොරව සිය සිතුවම් හරහා එවැනි තේමාවන් විවෘතව සාකච්ඡා කිරීමට තරම් එඩිතර වූ අතර, එය එකල ගතානුගතික සමාජයේ දැඩි කතාබහට ලක්වුණා.

රන්වන් පැහැ ගැන්වූ කොණ්ඩය, ඝන රාමුවක් සහිත උපැස් යුවල සහ නිරන්තරයෙන්ම මුව රැඳි දුම්වැටිය ඔහුගේ අනන්‍යතාවය බවට පත්ව තිබුණා.

සිය කලා ජීවිතය තුළ නව තාක්ෂණය භාවිත කිරීමට ඔහු දැක්වූයේ දැඩි රුචිකත්වයකි. පෝලරොයිඩ් කැමරා භාවිතයෙන් ඡායාරූප කෝලාජ් (Photocollage) ක්‍රමවේදය ලොවට හඳුන්වා දුන් ඔහු, පසුකාලීනව ෆැක්ස් යන්ත්‍ර, පරිගණක මුද්‍රණ යන්ත්‍ර මෙන්ම අයිපෑඩ් (iPad) වැනි ඩිජිටල් මෙවලම් භාවිතයෙන් ද නවීන පන්නයේ සිතුවම් නිර්මාණය කළේය. කලාව තුළ තාක්ෂණයේ භාවිතය පිළිබඳව අදහස් දක්වමින් ඔහු වරක් පවසා සිටියේ, රූපයක් හෝ සිතුවමක් නිර්මාණය කිරීමට දායක වන ඕනෑම තාක්ෂණික මෙවලමක් පිළිබඳව තමන් උනන්දු වන බවයි.

2018 වසරේදී ඔහු විසින් 1972 වසරේදී අඳින ලද "Portrait of an Artist (Pool with Two Figures)" නැමැති සිතුවම ඇමරිකානු ඩොලර් මිලියන 90.3කට අලෙවි වූ අතර, එය එවකට ජීවතුන් අතර සිටි චිත්‍ර ශිල්පියෙකුගේ සිතුවමක් අලෙවි වූ ඉහළම ලෝක වාර්තාව ද වුණා.

ජීවිතයේ අවසන් කාලයේදී විවිධ ශාරීරික අපහසුතාවලට සහ 2012 වසරේදී ඇතිවූ ආඝාත (Stroke) තත්ත්වයකට මුහුණ දුන්නද, ඔහු සිය නිර්මාණකරණය අත්හැරියේ නැහැ.

බ්‍රිතාන්‍ය රජය විසින් කිහිප වතාවක්ම ඔහු වෙත පිරිනැමීමට උත්සාහ කළ නයිට් පදවිය (Knighthood) පවා ප්‍රතික්ෂේප කළ හොක්නි, සෑමවිටම නිදහස් මතධාරී කලාකරුවෙකු ලෙස ජීවත් වීමට ප්‍රිය කළා.