අලුත්ගමදී මුහුදේ නෑමට ගිය විදුලිබල මණ්ඩලයේ සේවකයෙක් දිය රළකට හසුවී ජීවිතක්ෂයට

අලුත්ගම පොලිස් වසමේ සංචාරක හෝටලයක් පිටුපස වෙරළ තීරයේ මුහුදේ නෑමට ගොස් සිටියදී දිය රළකට හසුවී ගසාගෙන යාමෙන් ලංකා විදුලිබල මණ්ඩලයේ සේවකයෙකු අද (14) සවස ජීවිතක්ෂයට පත්ව ඇතැයි පොලිසිය පවසනවා.

මෙසේ දියේ ගිලීමෙන් ජීවිතක්ෂයට පත්ව ඇත්තේ මහදෙනිය, නාපාවල, ගැටහැත්ත ලිපිනයේ පදිංචිව සිටි මොහොට්ටි ආරච්චිලාගේ සුගත් ජයසිංහ (45) නමැති පුද්ගලයා බවයි පොපලිසිය සඳහන් කරන්නේ. ඔහු ලංකා විදුලිබල මණ්ඩලයේ අර්ධ පුහුණු කාර්මිකයෙකු ලෙස රාජකාරි කරනු ලැබූ අයෙක් බවද වාර්තා වෙනවා.

මියගිය පුද්ගලයා තවත් පිරිසක් සමඟ මුහුදේ දිය නෑමට ගොස් සිටියදී මෙලෙස දිය රළකට හසුවී ගසාගෙන ගොස් ඇති බවත්, පසුව ඔහු සමඟ පැමිණි අනෙක් පිරිස මේ පිළිබඳව සොයා බැලීමේදී, මෙම පුද්ගලයාගේ සිරුර වෙරළ තීරය ආසන්නයේ මුහුදේ පාවෙමින් තිබියදී සොයාගෙන වෙරළට රැගෙන විත් ඇතැයි පොලිිසිය සඳහන් කරනවා.

සිද්ධිය සම්බන්ධයෙන් අලුත්ගම පොලිස් ස්ථානය මගින් ඉදිරි වැඩිදුර විමර්ශන කටයුතු සිදු කරනවා.