හෝමුස් විවෘතයි: අමෙරිකානු නාවික අවහිරතා වහාම ඉවත් කෙරේ: සාම ගිවිසුම ස්ථිර බව ට්‍රම්ප් කියයි

ඉරානය සමග ඇති කරගත් සටන් විරාම ගිවිසුම දැන් සම්පූර්ණයෙන්ම සාර්ථක වී ඇති බව අමෙරිකානු ජනාධිපති ඩොනල්ඩ් ට්‍රම්ප් පවසනවා.

තම නිල 'Truth Social' සමාජ මාධ්‍ය ගිණුම ඔස්සේ විශේෂ ප්‍රකාශයක් නිකුත් කරමින් ට්‍රම්ප්, මේ බව සඳහන් කර තිබෙනවා.

සමස්ත ලෝකවාසීන්ටම සිය සුබපැතුම් එක් කරමින් ඔහු කියා සිටියේ, මෙම සාම එකඟතාවයත් සමඟ මැදපෙරදිග කලාපයේ පැවැති දැඩි යුදමය ආතතිය නිමාවට පත්ව ඇති බවයි.

මෙම සාම ගිවිසුමේ ප්‍රධාන පියවරක් ලෙස, මින් ඉදිරියට හෝමුස් සමුද්‍ර සන්ධිය (Strait of Hormuz) හරහා කිසිදු බදු ගෙවීමකින් තොරව (toll-free) නිදහසේ යාත්‍රා කිරීමට තමන් පූර්ණ අවසරය ලබාදෙන බවද ජනාධිපතිවරයා විසින් නිකුත් කළ පණිවිඩයේ සඳහන්.

එමෙන්ම, මෙතෙක් කල් ඉරාන මුහුදු කලාපය ඉලක්ක කරමින් ක්‍රියාත්මක වූ අමෙරිකානු නාවික හමුදා අවහිරතා (Naval blockade) වහාම ක්‍රියාත්මක වන පරිදි ඉවත් කර ගැනීමටද තමන් නියෝග කළ බවද ට්‍රම්ප් ජනපතිවරයා පවසනවා.

"ලෝකයේ සියලුම නැව්වල ඇන්ජින් පණගන්වන්න. නිදහසේ තෙල් ගලායාමට ඉඩ හරින්න!"

පාකිස්ථාන අග්‍රාමාත්‍ය ෂෙහ්බාස් ෂරීෆ් විසින් මීට පෙර අනාවරණය කරන ලද අමෙරිකා - ඉරාන ඓතිහාසික සාම ගිවිසුම, මෙම සති අන්තයේදී ස්විට්සර්ලන්තයේදී නිල වශයෙන් අත්සන් කිරීමට නියමිත පසුබිමක, අමෙරිකානු ජනාධිපතිවරයා විසින් ගන්නා ලද මෙම තීරණය ලෝක ආර්ථිකයට සහ ගෝලීය බලශක්ති වෙළඳපොළට විශාල සහනයක් වනු ඇතැයි විදේශීය මාධ්‍ය වාර්තා කරනවා.

මූලාශ්‍රය - අල්ජසීරා