අධිබලැති යතුරුපැදි පහක් අතුරුගිරියෙන් අල්ලයි

හෝමාගම කොට්ඨාස අපරාධ විමර්ශන කාර්යාංශයේ නිලධාරීන්ට ලද තොරතුරකට අනුව කරන ලද වැටලීමකදී අධිබලැති යතුරුපැදි පහක් අත්තඩංගුවට ගෙන තිබෙනවා.

ඒ අතුරුගිරිය මාලසිංහගොඩ ප්‍රදේශයේ පිහිටි නිවසක තිබියදීයි.

විමර්ශනවලදී අනාවරණය වී ඇත්තේ මෙම යතුරු පැදි විදෙස් රටකින් මෙරටට ආනයනය කරන ලද ඒවා බවයි.

යතුරුපැදි හිමිකරු ද මේ වනවිටත් අත්අඩංගුවට ගෙන ඇති බවයි වාර්තා වෙන්නේ.

අත්අඩංගුවට ගත් යතුරු පැදි අතර;
* BMW වර්ගයට අයත් 1000cc බලයෙන් යුත් යතුරුපැදිි දෙකක්,
* සුසුකි වර්ගයට අයත් යතුරුපැදී තුනක් ඒ අතර වේ. එම යතුරුපැදි තුන 1000cc, 600cc සහ 400cc ධාරිතාවයෙන් යුත් ඒවා බවයි පොලිසිය සදහන් කළේ.

මෙම යතුරුපැදි මෝටර් රථ ප්‍රවාහන කොමසාරිස් දෙපාර්තමේන්තුවේ ලියාපදිංචි කර නොමැති අතර අංක තහඩු නොමැති බවටද අනාවරණ වී තිබෙනවා.

නමුත් ඉන් යතුරුපැදි දෙකකට ව්‍යාජ අංක තහඩු යොදා ධාවනය කර ඇති බවයි වාර්තා වෙන්නේ.

මෙම යතුරුපැදි මෙරටට ගෙන්වන ලද්දේ කවුරුන් විසින්ද කුමන කාලයේදී ද යන්න පිළිබඳව මේ වන විටත් හෝමාගම කොට්ඨාස අපරාධ විමර්ශන කාර්යාංශයේ නිලධාරීන් විසින් විමර්ශන ආරම්භ කර තිබෙනවා.