අමෙරිකානු ජනාධිපති ඩොනල්ඩ් ට්‍රම්ප් ඉන්දියාවේ සංචාරයකට සැරසෙයි

අමෙරිකානු ජනාධිපති ඩොනල්ඩ් ට්‍රම්ප් ලබන වසරේ මුල් භාගයේදී ඉන්දියාවේ නිල සංචාරයක නිරත වීමට ඉඩ ඇති බව අමෙරිකානු රාජ්‍ය ලේකම් මාර්කෝ රුබියෝ පවසනවා.

වොෂින්ටන් නුවරදී IANS පුවත් සේවය සමඟ පැවැති සම්මුඛ සාකච්ඡාවකදී ඔහු කියා සිටියේ, ජනාධිපතිවරයාගේ මෙම සංචාරයට අවශ්‍ය පසුබිම සකස් කිරීම සඳහා තමන් ද මෙම වසර අගදී නැවත වරක් ඉන්දියාවේ සංචාරය කිරීමට බලාපොරොත්තු වන බවයි.

රාජ්‍ය ලේකම් රුබියෝ පසුගිය මාසයේදී ද ද්විපාර්ශ්වික සාකච්ඡා සහ Quad සංවිධානයේ විදේශ අමාත්‍යවරුන්ගේ හමුව සඳහා දින හතරක ඉන්දීය සංචාරයක නිරත වුණා.

මෙම නව සංචාරය ස්ථිර වුවහොත්, එය ජනාධිපති ට්‍රම්ප් සිය දෙවන ධුර කාලය තුළ ඉන්දියාවේ නිරත වන පළමු සංචාරය වනු ඇති.

මෙම මස මුලදී ප්‍රංශයේ එවියන් නුවර පැවැති G7 සමුළුව අතරතුරදී ඉන්දීය අග්‍රාමාත්‍ය නරේන්ද්‍ර මෝදි සහ ජනාධිපති ට්‍රම්ප් අතර ද්විපාර්ශ්වික සාකච්ඡාවක් පැවැත්වුණා.

මාස 16කට පසු නායකයන් දෙපළ මුහුණට මුහුණ හමුවූ පළමු අවස්ථාව මෙය වූ අතර, එහිදී ඔවුන් දෙරට අතර පවතින 'ඉන්දු-ඇමෙරිකානු COMPACT' එකඟතාව, ඇමෙරිකා-ඉරාන සාම ගිවිසුම සහ දෙරට අතර දැනට සාකච්ඡා වෙමින් පවතින ද්විපාර්ශ්වික වෙළඳ ගිවිසුම පිළිබඳව දීර්ඝ වශයෙන් කරුණු සාකච්ඡා කර තිබෙනවා.