මීගමුව බන්ධනාගාරයේ ගැටුම ගැන සෙවීමට කමිටුවක්

මීගමුව බන්ධනාගාරයේ රැඳවියන් කණ්ඩායම් දෙකක් අතර ඇති වූ ගැටුම සම්බන්ධයෙන් විමර්ශනය කිරීම සඳහා බන්ධනාගාර කොමසාරිස් ජනරාල්වරයා කණ්ඩායමක් පත් ක‍ර තිබෙනවා.

ඊයේ (05) දහවල් ඇති වූ දරුණු ගැටුමකින් රැඳවියන් දෙදෙනෙකු ජීවිතක්ෂයට පත්වූ අතර, එම ගැටුමට මත්ද්‍රව්‍ය ජාවාරමකට අදාළ තොරතුරු පාවා දීමේ සිද්ධියක් මුල් වී ඇති බවට තොරතුරු අනාවරණය වී ඇති බවයි පොලිසිය පවසන්නේ.

බන්ධනාගාරය තුළ ඇති වූ මෙම නොසන්සුන්කාරී තත්ත්වය හේතුවෙන් රැඳවියන් 34 දෙනෙකු තුවාල ලබා මීගමුව දිස්ත්‍රික් මහ රෝහලට ඇතුළත් කිරීමට බන්ධනාගාර නිලධාරීන් සහ පොලිසිය පියවර ගෙන තිබුණා.

පොලිසිය සඳහන් කළේ, රෝහල්ගත කළ පිරිස අතරින් රැඳවියන් දෙදෙනෙකු මේ වන විට ජීවිතක්ෂයට පත්ව ඇති බවත්, බරපතල තත්ත්වයේ පසු වූ තවත් රැඳවියන් දෙදෙනෙකු වැඩිදුර ප්‍රතිකාර සඳහා කොළඹ ජාතික රෝහල වෙත මාරු කර යවා ඇති බවයි.