මහනුවර ඩෙංගු අධි අවදානමක: කසළ දමන්නන්ට එරෙහිව දැඩි නීති!

මහනුවර මහ නගර සභා සීමාවේ ඩෙංගු අධි අවධානම් තත්ත්වයේ පවතින කලාප 07 ක් හඳුනා ගැනීමත් සමඟ අවිධිමත් ලෙස කසළ බැහැර කරන පුද්ගලයින්ට එරෙහිව දැඩි නීතිමය ක්‍රියාමාර්ග ගැනීමට නගර සභාව තීරණය කර තිබෙනවා.

ඩෙංගු අධි අවදානම් තත්ත්වයෙන් මහනුවර නගරය මුදා ගැනීම සදහා නගරාධිපති ප්‍රමුඛ නගර සභාව ඒකමතිකව මෙම තීන්දුව ගෙන තිබෙනවා.

පසුගිය සතිය තුළ පමණක් මහනුවර නාගරික සීමාවෙන් ඩෙංගු රෝගීන් 108 දෙනෙකු වාර්තා වී තිබෙන අතර රෝගීන් බහුතරය වාර්තා වී තිබෙන්නේ මහනුවර පොලීසිය අසල සිට පේරාදෙණිය පාර, බහිරවකන්ද, නිත්තවෙල දේවී පාර, හීරැස්සගල ආදි ප්‍රදේශ වලින්.

ඩෙංගු මදුරුවන් බෝවන ස්ථාන සම්බන්ධයෙන් කළ නිරීක්ෂණයේදී ජනතාව අවධිමත් ලෙස පරිසරයට මුදාහැර තිබූ යෝගට් කෝප්ප සහ බීම බෝතල් රැසක් සොයා ගැනීමට හැකිවූ බව මහනුවර නාගරික ප්‍රධාන වෛද්‍ය නිලධාරී වෛද්‍ය ක්‍රිෂාන්ත මාසාච්චි පැවසුවා.

මහනුවර නාගරික සීමාවේ ඩෙංගු රෝග ව්‍යාප්තිය පාලනය කිරීම සම්බන්ධයෙන් ගෙන තිබෙන තීරණ සම්බන්ධයෙන් මාධ්‍ය දැනුවත් කිරීම සඳහා අද (06) මහනුවර මහ නගර සභා ශාලාවේදී පැවැති රැස්වීමකදී ඔහු මෙම තොරතුරු අනාවරණය කළා.

ජනවාරි මාසයේ සිට මැයි ජූනි මාසය දක්වා රෝගීන් වාර්තා වීමේ සුළු වැඩිවීමක් පෙන්නුම් කළත් පසුගිය සති දෙකක කාලය තුළ රෝගීන්ගේ සැලකිය යුතු වැඩිවීමක් දක්නට ලැබුණු බවත් ජලය එකතුවිය හැකි ප්ලාස්ටික් හා වීදුරු බෝතල් වැනි දේ අවධිමත් ලෙස පරිසරයට මුදා හැරීම මිනි මැරීමට තැත් කිරීමක් ලෙස හැඳින්වීමේ වරදක් නොමැති බවත් හෙතෙම ප්‍රකාශ කළා.

මහනුවර ජාතික රෝහලේ රෝගීන් 110ක් ද පේරාදෙණිය ශික්ෂණ රෝහලේ රෝගීන් 90 දෙනෙකුද මේ වනවිට ප්‍රතිකාර ලබමින් සිටින්නේ යැයිද ඔහු පැවසුවා.

නියෝජ්‍ය පුරපති රුවන් ගලපිටියගේ ප්‍රධානත්වෙයන් මෙම රැස්වීම පැවැත්වුණා.