මීගමුවෙන් මාරු කළ රැඳවියන්ගේ නඩු සූම්වලින් අහන්න තීරණයක්

මීගමුව බන්ධනාගාරයේ සිට වෙනත් බන්ධනාගාර වෙත මාරුකර යැවු රැඳවියන්ගේ නඩු කටයුතු අවශ්‍ය වුවහොත් සූම් තාක්ෂණය ඔස්සේ සිදු කිරීමට බන්ධනාගාර දෙපාර්තමේන්තුව තීරණය කර තිබෙනවා.

එමෙන්ම අධිකරණය විසින් සිදුකරන ඉල්ලිම් මතද ඉදිරි පියවර ගැනීමට නියමිත බවයි එම දෙපාර්තමේන්තුවේ ජ්‍යෙෂ්ඨ ප්‍රකාශකයෙකු සඳහන් කළේ.

පසුගියදා මීගමුව බන්ධනාගාරයේ ඇති වු ගැටුමත් සමඟ බන්ධනාගාරයේ සිටි රැඳවියන් රැසක් වෙනත් බන්ධනාගාර වෙත යොමු කිරීමට පියවර ගෙන තිබුණා.

ඒ අනුව තවත් රැඳවියන් 600 දෙනෙකුට ආසන්න පිරිසක් එම බන්ධනාගාරයේ සිටින අතර ඔවුන් ද කඩිනමින් වෙනත් බන්ධනාගාර වෙත යොමු කිරීමට නියමිතයි.

මත්ද්‍රව්‍ය ජාවාරමක් පාවාදීමේ සිද්ධියක් මුල් කරගනිමින් මීගමුව බන්ධනාගාරයේ රැඳවියන් දෙපිරිසක් අතර පසුගියදා ඇති වූ ගැටුමෙන් බන්ධනාගාර නිලධාරීන් ද ඇතුළුව 100කට අධික පිරිසක් තුවාල ලැබූ අතර ඉන් 29 දෙනෙකු මියගියා.

මෙම ගැටුම අතුරතුර මියගිය බන්ධනාගාර නිලධාරීන් 08 දෙනාට රුපියල් ලක්ෂ 05 බැගින් වූ මූලික වන්දි මුදලක් ලබාදීමට අධිකරණ අමාත්‍යාංශය කටයුතු කළ අතර කෙසේවෙතත් අදාළ නිලධාරීන්ගේ පවුල් සඳහා රුපියල් ලක්ෂ 20කට අධික මුදලක් ලබාදීම සම්බන්ධයෙන් ද මේ වනවිට අවධානය යොමුව ඇති බව, බන්ධනාගාර මාධ්‍ය ප්‍රකාශක, බන්ධනාගාර කොමසාරිස් ඒ.සී. ගජනායක සඳහන් කළා.