ඉන්දියානු විවාහ උත්සවවල ‘සුපිරිම තේරීම’ ලෙස ශ්‍රී ලංකාව පෙරමුණට: මැදපෙරදිග යුද අර්බුදය මැද ලංකාවට දැවැන්ත ඉල්ලුමක්!

ඉන්දීය ධනවත් යුවළවල් සහ ප්‍රමුඛ පෙළේ ව්‍යාපාරික පවුල් විදේශයන්හි පවත්වනු ලබන දැවැන්ත මංගල උත්සව (Destination Weddings) සඳහා වන ලෝකයේ වේගයෙන්ම වර්ධනය වන ගමනාන්තය බවට ශ්‍රී ලංකාව පත්ව ඇති බව ජාත්‍යන්තර මංගල සැලසුම්කරණ ආයතනයක් වන WedMeGood සිය ‘2026 Destination Wedding’ වාර්තාව මගින් අනාවරණය කරනවා.

පසුගිය වසරට සාපේක්ෂව ඉන්දියානුවන් අතර ශ්‍රී ලංකාවේ පවතින මෙම මංගල ඉල්ලුම 25%ක කැපී පෙනෙන වර්ධනයක් පෙන්නුම් කරන බවයි එම වාර්තාවේ සඳහන් වන්නේ.

ලංකාවට ළඟාවීමේ පහසුව, ඉන්දියාවට ඇති සමීපභාවය, සුඛෝපභෝගී ආගන්තුක සත්කාර සහ අලංකාර පරිසරය මීට ප්‍රධානතම හේතු වී තිබෙනවා.

පසුගිය පෙබරවාරි මස ඇමරිකාව සහ ඊශ්‍රායලය විසින් ඉරානයට එල්ල කළ ප්‍රහාර සහ ඉන් අනතුරුව මැදපෙරදිග කලාපය පුරා හටගත් දරුණු යුදමය වාතාවරණය හේතුවෙන්, සම්ප්‍රදායිකව ඉන්දීය මංගල උත්සව සඳහා ඉහළ ආකර්ෂණයක් දිනා සිටි ඩුබායි ඇතුළු මැදපෙරදිග රටවල පැවැත්ම පිළිබඳව දැඩි අවිශ්වාසයක් මතුව තිබෙනවා.

ගුවන් ගමන් ගාස්තු ඉහළ යාම සහ කලාපීය අස්ථාවරත්වය හේතුවෙන් බොහෝ ඉන්දීය පවුල් සහ මංගල සැලසුම්කරුවන් වඩාත් ආරක්ෂිත සහ ගුවන් ගමන් පහසුකම් සපිරි ශ්‍රී ලංකාව විකල්පයක් ලෙස තෝරා ගැනීමට පෙළඹී ඇති බවයි TailorMade Experiences ආයතනයේ ප්‍රධානී ශෂාන්ක් ගුප්තා පවසන්නේ.

(මුලාශ්‍රය : financial times)