හර්ෂ මතු කළ ගැටලුවෙන් පසු නිදහස් චතුරශ්‍රයේ ඇවිදින මංතීරුවේ ප්‍රතිසංස්කරණ කටයුතු ඇරඹෙයි

නිදහස් චතුරශ්‍රයේ ඇවිදින මංතීරුව දැඩි ලෙස අබලන් වී ඇති බව පෙන්වා දෙමින්, ඊට කඩිනම් පියවර ගන්නා ලෙස සමගි ජන බලවේගයේ පාර්ලිමේන්තු මන්ත්‍රී හර්ෂ ද සිල්වා බලධාරීන්ගෙන් කළ ඉල්ලීමෙන් පසු එහි ප්‍රතිසංස්කරණ කටයුතු ආරම්භ කර තිබෙනවා.

ඊයේ (14) 'X' සටහනක් තබමින් ඔහු, සේවකයින් විසින් එහි ප්‍රතිසංස්කරණ කටයුතු සිදු කරන ඡායාරූප ද පල කරමින් එම පියවර අගය කර තිබුණා.

''වැඩකටයුතු ආරම්භ කර තිබෙනවා... නමුත් මා පෙන්වා දෙන තෙක් මෙතරම් කල් ගත වුණේ ඇයි? කොහොම වුණත් හොඳයි. ස්තූතියි. දැන් බලාපොරොත්තු වෙනවා ඔබ මෙය දිගටම පවත්වාගෙන යාවි කියා.'' යනුවෙන් ඔහු එහි සටහන් කර තිබුණා.

මෙම ස්ථානය දෛනිකව පරිහරණය කරන වයස්ගත පුද්ගලයන් ඇතුළු දහස් සංඛ්‍යාත සිවිල් ජනතාව මේ හේතුවෙන් දැඩි අනතුරුදායක තත්ත්වයකට මුහුණ දී සිටින බවයි පාර්ලිමේන්තු මන්ත්‍රී හර්ෂ ද සිල්වා මීට පෙර සිය නිල X සමාජ මාධ්‍ය ගිණුම ඔස්සේ විශේෂ අනාවරණයක් කරමින් පෙන්වා දුන්නේ.

මන්ත්‍රීවරයා ප්‍රකාශ කරන්නේ, මංතීරුවේ ඇති ගල් කැට මතු වී රළු මතුපිටක් නිර්මාණය වීම නිසා ඇවිදින ජනතාව නිතර බිම ඇද වැටී තුවාල ලබන බවයි.