සැකකරුවන් නිවාස අඩස්සියේ තබන පනත් කෙටුම්පත කඩිනම් කෙරේ

බන්ධනාගාර තදබදයට විකල්පයක් ලෙස සැකකරුවන් සහ වැරදිකරුවන් නිවාස අඩස්සියේ රඳවා තැබීම සඳහා යෝජිත පනත් කෙටුම්පත සකස් කිරීමේ ක්‍රියාවලිය කඩිනම් කිරීමට කැබිනට් අනුමැතිය හිමිව තිබෙනවා.

එම නීති කෙටුම්පත් සම්පාදනය සමාලෝචනය කිරීමට අදාල යෝජනාව අධිකරණ හා ජාතික ඒකාබද්ධ අමාත්‍ය හර්ෂණ නානායක්කාර විසින් ඉදිරිපත් කර තිබුණා.

මේ වනවිටත් ඊට අදාල නීති කෙටුම්පත් සකසා ඇති අතර අදාල පනත් කෙටුම්පතට අවශ්‍ය තවත් විධි විධාන ඇතුළත් කර කඩිනමින් නිම කිරීමට නියමිතයි.

මේ අතර, අධිකරණයේ ස්වාධීනත්වය තවදුරටත් ශක්තිමත් කිරීම සඳහා ආණ්ඩුක්‍රම ව්‍යවස්ථාව සහ අධිකරණ සංවිධාන පනත සංශෝධනය කිරීමටද කැබිනට් අනුමැතිය ලැබී තිබුණා.