පුටින්ගේ එටොරොෆු සංචාරයට ජපානයෙන් දැඩි විරෝධයක්

රුසියානු ජනාධිපති ව්ලැදිමීර් පුටින් එටොරොෆු දූපතේ සිදුකළ සංචාරය සම්බන්ධයෙන් ජපාන අග්‍රාමාත්‍යවරිය සනේ ටකායිචි දැඩි විරෝධය පළ කර තිබෙනවා.

ජපාන අග්‍රාමාත්‍යවරිය ප්‍රකාශ කර ඇත්තේ, උතුරු ප්‍රදේශ ලෙස හැඳින්වෙන දූපත් ඓතිහාසිකව මෙන්ම ජාත්‍යන්තර නීතිය යටතේද ජපානයට අයත් භූමියක් බවයි.

රුසියානු ජනාධිපතිවරයා එටොරොෆු වෙත පැමිණීම, උතුරු ප්‍රදේශ සම්බන්ධයෙන් ජපානය දිගුකාලීනව පවත්වාගෙන යන ස්ථාවරයට සම්පූර්ණයෙන්ම පටහැනි බවද ඇය අවධාරණය කර තිබෙනවා.

එම සංචාරය ජපාන ජනතාවගේ හැඟීම්වලට ද දැඩි බලපෑමක් එල්ල කර ඇති අතර, එය කිසිසේත් පිළිගත නොහැකි ක්‍රියාවක් බව ටකායිචි පවසා ඇති බවයි විදෙස් මාධ්‍ය වාර්තා කරන්නේ.

රුසියාව, යුක්‍රේනය ආක්‍රමණය කිරීමෙන් පසු ජපානය සහ රුසියාව අතර සබඳතා දැඩි අර්බුදකාරී තත්ත්වයකට පත්ව ඇති බව සඳහන් කළ ඇය, එවැනි තත්ත්වයක් යටතේ වුවද සබඳතා යථා තත්ත්වයට පත් කිරීම සඳහා ජපානය හැකි සෑම උත්සාහයක්ම ගෙන ඇති බවද කියා සිටියා.

කෙසේ වෙතත්, පුටින්ගේ මෙම සංචාරය හේතුවෙන් ජපානය තුළ රුසියාවට එරෙහි විරෝධී හැඟීම් තවදුරටත් දැඩි වී ඇති බවත්, මධ්‍ය හා දිගුකාලීනව දෙරට අතර සබඳතා යථා තත්ත්වයට පත් කිරීම තවදුරටත් දුෂ්කර වී ඇති බවත්, ජපාන අග්‍රාමාත්‍යවරිය පෙන්වා දී තිබෙනවා.

රුසියානු පාර්ශ්වය මෙම සිද්ධියේ බරපතලකම සම්බන්ධයෙන් නිසි අවබෝධයක් ලබාගත යුතු බවද ඇය අවධාරණය කර ඇති බවයි විදෙස් මාධ්‍ය වැඩිදුරටත් සඳහන් කරන්නේ.