හෝමාගම කුලී යතුරුපැදිකරු ඝාතනයේ ප්‍රධාන සැකකරු අත්අඩංගුවට

හෝමාගම ප්‍රදේශයේදී කුලී යතුරුපැදිකරුගේ ගෙල කපා ඝාතනය කිරීමේ සිද්ධියේ ප්‍රධාන සැකකරු පොලිස් අත්අඩංගුවට ගෙන තිබෙනවා.

ඝාතනය සඳහා යොදාගත් තියුණු ආයුධය, මියගිය පුද්ගලයාගේ හිස්වැසුම සහ ජංගම දුරකථනය ද සමගින් සැකකරු අත්අඩංගුවට ගෙන තිබුණේ මින්නේරිය - ජයන්තිපුර ප්‍රදේශයේදීයි.

අත්අඩංගුවට ගත් සැකකරු රුවන්වැල්ල, වැන්දල ප්‍රදේශයේ පදිංචි 51 හැවිරිදි පුද්ගලයෙකු බවයි පොලිසිය සඳහන් කළේ.

ඉකුත් ජූලි මස 15 දා යතුරුපැදියකට ලැබුණු කුළී රථ ඇනවුමක් අනුව පිටව ගොස් තිබූ කුලී රථ රියැදුරුගේ සිරුර හෝමාගම ප්‍රදේශයේ ඇල මාර්ගයක දමා ගොස් තිබියදී සොයාගනු ලැබුවේ ඉන් දින දෙකකට පසුවයි.

අදාළ ඝාතනය පිය පුතු දෙපලක් විසින් සිදු කර ඇති බවට අනාවරණ වීමත් සමග සිද්ධියට ආධාර අනුබල දුන් බවට පැවසෙන පුත්‍රයා මීට පෙර අත්අඩංගුවට ගෙන මේ වන විට රක්ෂිත බන්ධනාගාර ගත කර තිබෙනවා.

මෙම ඝාතනයේ ප්‍රධාන සැකකරු වන පියා සිද්ධිය වීමට සුළු මොහොතකට පෙර වෙළෙඳසැලක් තුළ සිටින අයුරු දැක්වෙන CCTV කැමරා දර්ශන පෙළක් විමර්ශන නිලධාරීන් විසින් සොයාගෙන තිබුණා.

අදාළ ඝාතනයෙන් පසු සැකකාර පිය පුතු දෙපළ තවත් රන්මාල සොරකමක් සිදු කර පළා යන අයුරු ද CCTV කැමරාවක සටහන්ව තිබුණු බව පොලිසිය සඳහන් කළා.